ލިޔުނީ އަބްދުﷲ ރަޝީދު، ދިލާވަރުގެ / އޭދަފުށި ޖުލައި މަހުގެ ފަންސަވިސް ވަނަ ދުވަހުގެ ރެއެވެ. ބެންކް އޮފް މޯލްޑިވްސް އޭދަފުށި ބްރާންޗް ކައިރީ ހުރި އޭޓީއެމް މެޝިނުން ދެހާސް ރުފިޔާ ނެގުމަށް ފަހު ރިޝާދާ ހިނގައިގަތީ ގެއަށް ދިއުމަށެވެ. އެވަގުތު މާ ދުރުގައި އެމަންޒަރު ބަލަން ހުރި ހަކީމް އާއި އޭނަގެ ދެ އެކުވެރިންގެ ހިތުގައި ކުރެހެމުން ދިޔައީ މުޅިން އެހެން ކަހަލަ މަންޒަރެކެވެ. އޭޓީއެމް މެސިނުން ރުފިޔާ ނަގަނީ ކޮންބައެއް، ކޮންވަގުތެއްގައި ކަމާ، އެމީހުން ނަގަނީ ކިހާ ފައިސާއެއް ކަން ގިނަ ފަހަރަށް މިމީހުންނަށް ސިއްރެއް ނުވެއެވެ. ނަގާ ފައިސާގެ އަދަދު ގިނަފަހަރަށް އެނގެނީ މެސިން ކައިރީ ހުންނަ ޑަސްޓް ބިން ގެ އެހީގައެވެ.