އަންހެނުންގެދުވަސް ޕްރޮވިންސް ލެވެލްގައި އޭދަފުށީގައި ފާހަގަކުރުމުގެ ގޮތުން ހުކުރުދުވަހު ހަވީރު އޮތް ވާދެމުން ކާމިޔާބު ކުރި "ގަލްފް ގާލްސް" ޓީމްގެ ބަދަލުގައި ޗެންޕިއަން ތަށި އޭދަފުށީ އަންހެނުން ތަރައްޤީއަށް މަސައްކަތް ކުރާ ކޮމެޓީއާ ހަވާލުކުރުމާ ގުޅިގެން ގަލްފު ޓީމުން އެކަމާ ނުރުހުން ފާޅުކޮށްފިއެވެ.

ގަލްފް ޓީމުން މެޗް ކާމިޔާބުކޮށް ޗެންޕިއަންކަން ހޯދާފައިވަނިކޮށް ހުކުރު ދުވަހުގެރޭ އޮތް ސްޓޭޖް ޝޯގައި ފެމެލީ ސެންޓަރުން، ޗެންޕިއަނުންގެ ގޮތުގައި ތަށި ހަވާލުކުރީ އޭދަފުށީ އަންހެނުން ކޮމެޓީގެ ނާއިބް ރައީސާ ނިއުމާ އަހްމަދާއެވެ. އެހެންނަމަވެސް ގަލްފް ޓީމުން ބުނީ އެ ޓީމަކީ އަންހެނުން ކޮމެޓީއާ އެއްވެސް ގުޅުމެއް އޮތް ޓީމެއް ނޫންކަމަށާ، މި މައްސަލާގައި ވަރަށް ބޮޑަށް ނުރުހުން ފާޅުކުރާ ކަމަށެވެ.

"ވަރަށް ހިތާމަ ކުރާ ކަމެއް. ލިބިފާއޮތް އެއްޗެއް އަތަށްނޭރީމާ ދެރަވާނެތާ. ގަލްފު ސަރަހައްދު މައިތަނބު އަދި ޓީމްގެ ކޯޗް ރަޝާދު ބުންޏެވެ. "ވަގުތުން އިސްޓޭޖް ކައިރީގާވެސް މަބުނީމޭ ނުބާ އެއްޗެކޭ ތިޔަކިޔަނީ. މި ޓީމްގެ ކޯޗަކީ މަ. މެނޭޖަރަކީ މަގޭ އަންހެނުން. ކޮމެޓީއާ ގުޅޭ ކަމެއްނޫން މީއަކީ."

މިކަމާ ގުޅިގެން ބ. އަތޮޅު ފެމެލީ އެންޑް ޗިލްރަން ސާވިސް ސެންޓަރުން ބުނީ އެކަން ކުރެވިފައިވަނީ އޮޅުކަމުން ކަމަށާ، އޭދަފުށީ އަންހެނުން ކޮމެޓީއާ ހަވާލުކޮށްފައިވާ ތަށި އަނބުރާ ގަލްފާ ހަވާލުކުރުމަށް މަޝްވަރާ ކުރަމުންދާކަމަށެވެ.

"އަޅުގަނޑުމެންގެ އޮފިޝަލުންނަށް އެރި އޮޅުމެއް އެއީ. އެކަން ރަނގަޅު ކުރުމަށް މިހާރު މަޝްވަރާ ކުރެވެމުން އެބަދޭ" ބ. އަތޮޅު ފެމެލީ ސެންޓަރުން ވާހަކަދެއްކި އޮފިޝަލަކު މިއަދު ބުންޏެވެ.