ބ. ގޮއިދޫގައި ދަނޑުވެރިކަން ކުރާނޭ ނަމޫނާ ދަނޑެއް ހެދުމުގެ މަސައްކަތް ކުރަމުންދާކަމަށް އެގްރިކަލްޗަރ މިނިސްޓްރީން ވިދާޅުވެއްޖެ އެވެ.

އެ މިނިސްޓްރީން ބުނިގޮތުގައި މިކަމަށް ބޭނުންވާ އެއްލައްކަ އަކަފޫޓަށްވުރެ ބޮޑުބިމެއް ކަނޑައެޅުމުގެ މަސައްކަތް މިހާރު ގޮއިދޫގައި ކުރިޔަށް އެބަދެ އެވެ.

އެގްރިކަލްޗަރ މިނިސްޓްރީގެ ސީނިއަރ އެގްރިކަލްޗަރ އޮފިސަރ މުހައްމަދު އަފީފު ވިދާޅުވީ ބ. އަތޮޅުގެ ތިމާވެށި ހިމާޔަތް ކުރުމަށް މަސައްކަތްކުރާ އޭ.އީ.ސީ ޕްރޮޖެކްޓާ ގުޅިގެން އެގްރިކަލްޗަރ މިނިސްޓްރީން ކުރިޔަށްގެންދާ މި މަސައްކަތުގެ މައިގަނޑު ބޭނުމަކީ ރާއްޖޭގައި ހެދޭ މޭވާގެ ބާވަތްތައް އިތުރުކުރުމަށް ދަނޑުވެރިންނަށް ހިތްވަރުދިނުން ކަމަށެވެ.

މިދަނޑު ދެމެހެއްޓެނިވި ގޮތެއްގައި ބެލެހެއްޓުމަށްޓަކައި ގޮއިދޫގެ ދަނޑުވެރިންގެ މެދުގައި ވިޔަފާރީގެ ޖަމާއަތެއް ހަދަން މަސައްކަތް ކުރަމުންދާކަމަށާއި އަދި މިދަނޑުގައި މައިގަނޑުގޮތެއްގައި އާލާކުރަން ގަސްދުކޮށްފައިވަނީ ބަނބުކޭލާ، އަނބު، އަންނާރު އަދި އަތަ ކަމަށް އެގްރިކަލްޗަރ މިނިސްޓްރީން ބުނެއެވެ.