ތޯރިގު އަބްދުއްރަހްމާން

ކުއްލިޔަތުއް ދިރާސާތުއް އިސްލާމިއްޔާގެ ތިން ކޯހެއް ބ. ހިތާދޫގައި މިދިޔަ ހަފްތާގައި ފަށައިފި އެވެ.

މިދިޔަ އާދީއްތަ ދުވަހު އެރަށުގައި ފެށި ތިން ކޯހަކީ ގިރާއަތު އެޑްވާންސް ސެޓްފިކެޓްގެ ފައުންޑޭޝަން ކޯހާއި އިމާމު ކޯހާއި އަދި އަރަބި ބަހުގެ ސެޓްފިކެޓް ކޯހެވެ. މި ތިން ކޯސް ފެށުމުގެ ގޮތުން ހާއްސަ ޖަލްސާއެއް މިދިޔަ އާދީއްތަ ދުވަހުގެ ރޭ ހިތާދޫ ސްކޫލުގައިވަނީ ބާއްވައިފަ އެވެ. މި ޖަލްސާގައި ކުއްލިއްޔާގެ އެކްޓިން ޑީން އަހުމަދު ރަޝީދު ބައިވެރިވެވަޑައިގެންނެވިއެވެ.

ކުއްލިއްޔާގެ އޮފިޝަލަކު ވިދާޅުވީ 60 މީހުން ބައިވެރިވެފައިވާ ގިރާއަތު އެޑްވާންސް ސެޓްފިކެޓްގެ ފައުންޑޭޝަން ކޯހަކީ އެއް އަހަރު ދުވަހުގެ ކޯހެއް ކަމަށާއި ދެ އަހަރު ދުވަހުގެ އަރަބި ބަހުގެ ސެޓްފިކެޓް ކޯހުގައި 30 މީހުން ބައިވެރިވެފައިވާ ކަމަށެވެ. އަދި އެއް އަހަރު ދުވަހުގެ އިމާމު ކޯހުގައި 19 މީހުން ބައިވެރިވެފައިވާ ކަމަށްވެސް ކުއްލިއްޔާއިން ބުނެއެވެ.

ކުއްލިއްޔާއިން ބުނީ އެތަނުގެ އަމާޒަކީ ކުއްލިއްޔާގެ ކެމްޕަސްތަކެއް ރާއްޖޭގެ ގިނަ ރަށްތަކެއްގައި ހުޅުވި އިސްލާމީ ތައުލީމް އާއްމުވެގެން ދިޔުން ކަމަށެވެ.