މިމަހުގެ 11 ން 13 އަށް ބ. އަތޮޅު ތައުލީމީ މަރުކަޒުގައި ބޭއްވި އެ މަރުކަޒުގެ މިއަހަރުގެ ގުރުއާން ކިޔެވުމުގެ މުބާރާތުގެ ނަތީޖާ ފާޅުކުރުމާއި އިނާމު ދިނުމުގެ ޖަލްސާ މިރޭ އޮންނާނެކަމަށް އެ ސްކޫލުން ބުނެފިއެވެ.

ސްކޫލުން ބުނީ ގުރުއާން ކިޔެވުމުގެ މުބާރާތުގެ ނަތީޖާ ފާޅުކުރުމަށް މިރޭ އެ ސްކޫލުގެ ހޯލުގައި ބާއްވާ ޖަލްސާގައި މުޅި މުބާރާތުން ދެގޮފިން 1، 2 އަދި 3 ވަނައިގެ އިތުރުން ގްރޭޑްތަކުން ވެސް 1، 2 އަދި 3 ހޮވާ އިނާމާއި ސެޓްފިކެޓް ދޭގޮތަށް ހަމަޖެހިފައިވާ ކަމަށެވެ.

ކީރިތި ގުރުއާނަށް ދޭ އަހަމިއްޔަތު އިތުރުކޮށް، ކުދިންގެ ހިތްތަކުގައި ގުރުއާން ކިޔެވުމުގެ ޝައުގުވެރިކަން އިތުރު ކުރުމުގެ މަގުސަދުގައި ބޭއްވި މި މުބާރާތުގައި އެ ސްކޫލުގެ 140 އަށްވުރެ ގިނަ ދަރިވަރުން ބައިވެރިވެ ކިޔަވާފައިވާ ކަމަށް އެ ސްކޫލުން ބުންޏެވެ.

ނަތީޖާ ފާޅުކުރުމުގެ ޖަލްސާގައި ބައިވެރިވުމަށް މި މުބާރާތުގައި ބައިވެރިވި ހުރިހާ ދަރިވަރުންނާއި އެ ދަރިވަރުންގެ ބެލެނިވެރިން މިރޭ 8:30 އަށް ސްކޫލަށް ހާޒިރުވުމަށް އެ މަރުކަޒުން އެދެއެވެ.