ބ. އޭދަފުށީ ކައުންސިލާއި ރިވައިވަލް ސްޕޯޓްސް ގުޅިގެން ބާއްވާ “އޭދަފުށި ބެޑްމިންޓަން ކަޕް 2024” މިމަހުގެ 26 ގައި ބާއްވަން ނިންމާ، މުބާރާތުގައި ބައިވެރިވުމުގެ ފުރުސަތު ހުޅުވާލައިފި އެވެ.
މި މުބާރާތަކީ އަންހެން އަދި ފިރިހެން ދެ ޖިންސުގެ ކުޅުންތެރިންނަށް ބައިވެރިވެވޭ ގޮތަށް ރޭވިފައިވާ މުބާރާތެކެވެ. މުބާރާތުގައި އިވެންޓަކާއި އޯޕަން އިވެންޓްގެ މެޗުތައް ކުރިއަށް ގެންދިއުމަށް ވަނީ ހަމަޖެހިފައެވެ.
މިމުބާރާތުގެ މަގުސަދަކީ، އޭދަފުށީ ގެ ބެޑްމިންޓަން ކުޅުންތެރިންނަށް ގައުމީ ފެންވަރުގައި ވާދަ ކުރުމުގެ ފުރުސަތު ރަށުގައި ތިބެގެން ތަނަވަސް ކޮށްދިނުމާއި އަދި އޭދަފުށީގައި ބެޑްމިންޓަންގެ ފޯރި އިތުރުކުރުމެވެ.
މި މުބާރާތުގައި ކުޅެވޭނީ ހަމައެކަނި ދިވެހި ކުޅުންތެރިންނަށެވެ. މުބާރާތުގެ ޓީމު އިވެންޓަގައި ބައިވެރިވުމަށް އެދި ހުށަހެޅޭނީ ސްޕޯޓްސް ކޮމިޝަންގައި ރަޖީސްޓްރީ ކޮށްފައިވާ އެކްޓިވް ކުލްބުތަކަށެވެ.
މުބާރާތުގައި ބައިވެރިވުމަށް ޝައުޤުވެރިވާ ފަރާތްތަކަށް ރަޖިސްޓްރީ ކުރުމުގެ ފުރުސަތު ސެޕްޓެމްބަރު 15 އަށް ވަނީ ހުޅުވާލާފަ އެވެ.
މި މުބާރާތް ކުރިއަށް ދާނީ ސެޕްޓެމްބަރ 27 އިން އޮކްޓޯބަރު 4 އަށް އޭދަފުށީ ބެޑްމިންޓަން ކޯޓުގަ އެވެ.
އޭދަފުށީ ކައުންސިލުން ވަނީ މި މިބާރާތުގެ ޗެމްޕިއަން ޓީމަށް 15،000 ރުފިޔާ އަދި ރަނާއަޕް ޓީމަށް 10،000 ރުފިޔާ ދޭން ވަނީ ނިންމައިފަ އެވެ.
