ރާއްޖޭގައި ފެހުރިހި ހިމާޔަތްކުރުމާއި އޭގެ މާޙައުލު ރައްކާތެރިކުރުމާ ގުޅޭ އާ އުސޫލެއް ސަރުކާރުން ހަދައިފި އެވެ.
ތިމާވެއްޓާ ބެހޭ މިނިސްޓްރީން މި އުސޫލު އާންމުކުރީ ދުނިޔޭގެ ފެހުރިހީގެ ދުވަސް ފާހަގަކުރުމަށް އދ. ދިގުރަށުގައި ބޭއްވުނު ޚާއްޞަ ރަސްމިއްޔާތެއްގައެވެ.
މި އާ އުސޫލުގައި ހިމެނޭ މުހިންމު ބައިތަކުގެ ތެރޭގައި:
1. ފެހުރިއްސާ ކައިރިވުން:
– މޫދަށް އެރި އުޅޭއިރު ފެހުރިއްސާ ތިން މީޓަރަށް ވުރެ ކައިރި ނުވުން
– ފެހުރިހީގެ ނިގޫކޮޅާ ދިމާލުން ހަތަރު މީޓަރަށް ވުރެ ކައިރި ނުވުން
– ފެހުރިހި ދަތުރުކުރާ ދިމާލަށް ހުރަސްއެޅުން މަނާކުރުން
2. ފެހުރިހީގެ ރައްކާތެރިކަން:
– ފެހުރިހީގައި އަތްލުމާއި ގޯނާކުރުން މަނާކުރުން
– ފެހުރިއްސަށް ކާންދިނުން މަނާކުރުން
– އެއްވެސް ބާވަތެއްގެ ފްލޭޝް ބޭނުންކުރުން މަނާކުރުން
3. އުޅަނދުފަހަރާ ގުޅޭ ގަވާއިދުތައް:
– ފެހުރިހީގެ 250 މީޓަރު ވަށައިގެން “ކޮންޓެކްޓް ޒޯން” އެއް ކަނޑައެޅުން
– ކޮންޓެކްޓް ޒޯނުގައި ގަޑިއަކު 5 ނޮޓަށް ވުރެ ބާރަށް އުޅަނދު ނުދުއްވުން
– ފެހުރިހީގެ 50 މީޓަރު ބައުންޑަރީ ތެރޭގައި އުޅަނދުތަކުގެ ބާރުމިން ގަޑިއަކު 2 ނޮޓަށް ތިރިކުރުން
– ކޮންޓެކްޓް ޒޯނުގައި އެއްފަހަރާ ހަރަކާތްތެރިވެވޭނީ 3 އުޅަނދަށް
4. ޑްރޯން ބޭނުންކުރުން:
– ފެހުރިހީގެ ޑްރޯން ފޮޓޯ ނަގަންވާނީ ކަނޑުގެ ލޮނުގަނޑުން ފެށިގެން 30 މީޓަރަށް ވުރެ މަތިން
5. އަނިޔާވެފައިވާ ނުވަތަ ބަލިވެފައިވާ ފެހުރިއްސާމެދު ޢަމަލުކުރާނެ ގޮތް:
– އީޕީއޭއަށް އަވަހަށް އެންގުން
– ފެހުރިހީގައި އޮޅިފައިވާ ވާ ނުވަތަ ދާ ރައްކާތެރިކަމާއެކު ވަކިކުރުން
– އަނިޔާވެފައިވާ ފެހުރިއްސަށް އަމިއްލައަށް ފަސޭހަވުމަށް ފުރުޞަތު ދިނުން
މި އުސޫލަށް ޢަމަލުކުރަން ފަށާނީ މީގެ ތިން މަސްދުވަސް ފަހުންނެވެ. އުސޫލާ ޚިލާފުވާ ފަރާތްތައް ހިމާޔަތްކޮށް ރައްކާތެރިކޮށްފައިވާ ދިރޭތަކެއްޗާ ބެހޭ ގަވާއިދުގެ ދަށުން ޖޫރިމަނާކުރެވޭނެ ކަމަށް އުސޫލުގައި ބަޔާންކޮށްފައިވެ އެވެ.
ރާއްޖޭގައި ފެހުރިހި މައިގަނޑު ގޮތެއްގައި ފެންނަނީ ބ. ހަނިފަރު ކައިރިންނާއި އދ. މާމިގިލީ ބޭރުންނެވެ. މި ދެ ސަރަހައްދަކީވެސް ސަރުކާރުން ހިމާޔަތްކޮށްފައިވާ ސަރަހައްދުތަކެކެވެ. ނަމަވެސް ފާއިތުވި އަހަރުތަކުގައި އެކަށީގެންވާ މޮނިޓަރިންގ ނެތުމުގެ ސަބަބުން ފެހުރިހި ފެންނަ މިންވަރު ވަނީ ދަށަށް ގޮސްފައެވެ.
ފެހުރިއްސަކީ 2016 ވަނަ އަހަރުގެ ޖުލައި މަހުގައި ބައިނަލްއަޤްވާމީ ޖަމްޢިއްޔާއެއް ކަމުގައިވާ އައިޔޫސީއެން (އިންޓަނޭޝަނަލް ޔޫނިއަން ފޯ ކޮންސަވޭޝަން އޮފް ނޭޗަރ) އިން އެ ޖަމްޢިއްޔާގެ “ރެޑް ލިސްޓް އޮފް ތްރެޓަންޑް ސްޕީޝީސް” ގައި ހިމަނައި، ނެތިދިއުމުގެ ބިރު ހީވެފައިވާ ދިރުމެއްގެ ގޮތުގައި ކަނޑައަޅާފައިވާ ދިރުމެކެވެ. މި ކަނޑައެޅުމާ ގުޅިގެން، ދުނިޔޭގެ އެކި ޤައުމުތަކުގައި ފެހުރިހި ހިމާޔަތްކުރުމުގެ މަސައްކަތް ވަނީ އިތުރަށް ހަރުދަނާކޮށްފައެވެ. އެގޮތުން ރާއްޖޭގައި ވެސް ފެހުރިހި ހިމާޔަތްކުރުމަށް އެކި ފިޔަވަޅުތައް އަޅަމުންދާއިރު، މިފަދަ އާ އުސޫލެއް ތަޢާރަފުކުރުމަކީ މި ދިރުން ރައްކާތެރިކުރުމަށް އެޅޭ މުހިންމު ފިޔަވަޅެކެވެ.
ފެހުރިހީގެ އާބާދީއަށް ނޭދެވޭ އަސަރުކުރާ އެންމެ ބޮޑު ސަބަބުތަކުގެ ތެރޭގައި އިންސާނުންގެ ނުރަނގަޅު ޢަމަލުތަކާއި މޫސުމަށް އަންނަ ބަދަލުތަކުގެ ސަބަބުން އޭގެ މާޙައުލަށް ކުރާ އަސަރު ހިމެނެއެވެ.
