ބ. އޭދަފުށީ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ފަރާތުން ބ. އޭދަފުށީގައި ކަސަބު ބޯވަޅު ގަތަން ދަސްކޮށްދޭ ކޯހެއް ފަށަން ތައްޔާރުވެއްޖެ އެވެ.
ފަނަރަ ދުވަހުގެ މުއްދަތަށް ކުރިއަށްގެންދާ މި ކޯހުގައި ބައިވެރިވުމުގެ ފީއެއްގެ ގޮތުން ނަގަން ނިންމާފައި ވަނީ 2000ރ. އެވެ. އަންހެނުން ކޮމެޓީން، ބުނި ގޮތުގައި ބައިވެރިވާ ފަރާތްތަކުގެ ކޯސްފީގެ ދެބައިކުޅަ އެއްބައި އެ ކޮމެޓީން ދައްކައިދޭނެ އެވެ.
މި ކޯހުގައި ބޭނުންވާ މީހުންނަށް، މިމަހުގެ 30ގެ ނިޔަލަށް ނަން ނޯޓް ކުރުމުގެ ފުރުސަތު އޮންނާނެ އެވެ.
ކަސަބު ވިޔުމަކީ ރާއްޖޭގައި އުވެމުންދާ މަސައްކަތެއް ކަމުން އަންހެނުން ކޮމެޓީގެ އަމާޒަކީ މިފަދަ މަސައްކަތް ކުރާ މީހުން އިތުރުކޮށް، މި މަސައްކަތުން އަންހެނުންނަށް ރަނގަޅު އާމްދަނީއެއް ލިބޭނެގޮތް ހަދައިދިނުމެވެ.
މި ކޯހާގުޅޭ އިތުރު މައުލޫމާތު 7547765، 7838786 އިން ލިބޭނެ ކަމަށް އަންހެނުން ކޮމްޓީން ބުންޏެވެ.
