ދިވެހި ރައްޔިތެއްކަން އަންގައިދޭ ކާޑު (އައިޑީކާޑު) މާލެ ފިޔަވައި އެހެން ރަށެއްގައި ޕްރިންޓްކުރެވޭނެ އިންތިޒާމު ސަރުކާރުން ފުރަތަމަ ފަހަރަށް ހަމަޖައްސައިދީފިއެވެ. މި ޚިދުމަތް މިއަދު ރަސްމީކޮށް ފަށައިފައިވަނީ ގއ. ވިލިނގިލީގައެވެ.
ވިލިނގިލީގައި މި ޚިދުމަތް ފެށުމުގެ ގޮތުން ބޭއްވުނު ޚާއްޞަ ރަސްމިއްޔާތުގައި ހޯމްލޭންޑް މިނިސްޓަރު އަލީ އިހުސާން ބައިވެރިވެވަޑައިގަތެވެ. މި ޚިދުމަތް ފެށުމާއެކު، ވިލިނގިލީގައި އައިޑީކާޑު ޕްރިންޓްކޮށް، ހަވާލުކުރުމުގެ ޚިދުމަތް ވެސް ލިބެން ފަށާނެއެވެ.
މީގެ ކުރިން ކައުންސިލްތައް މެދުވެރިކޮށް އައިޑީކާޑަށް އެދި ހުށަހެޅުމުގެ ހިދުމަތް ދިނެވެ. ނަމަވެސް 2022 ވަނަ އަހަރު ވަނީ ޑީއެންއާރުގެ ހާއްސަ ޕޯޓަލެއް މެދުވެރިކޮށް ކޮންމެ ތަނަކު ހުރެގެން ވެސް އައިޑީކާޑަށް އެދެވޭނެ ގޮތަށް ހަދައިފަ އެވެ. ކާޑު ޕްރިންޓުކުރުމަށް ފަހު، ކުރިއަރު މެދުވެރިކޮށް އެ މީހަކު ހުރި ރަށެއްގެ ކައުންސިލަށް ކާޑު ފޮނުވަ އެވެ.
އުމުރުން 65 އަހަރުން މަތީގެ މީހުންގެ އައިޑީކާޑުގެ މުއްދަތު ހަމަނުވާނެ ގޮތަށް ބަދަލުކުރުމުގެ މަސައްކަތް ކުރަމުންދާ ކަމަށް ޑީއެންއާރުން މި އަހަރުގެ ކުރީކޮޅު ބުނެފައިވެއެވެ. މިހާރު އުމުރުން 10 އަހަރާއި 40 އަހަރާ ދެމެދުގެ މީހުންގެ ކާޑުގެ މުއްދަތަކީ 5 އަހަރެވެ. އަދި 40 އަހަރުން މަތީގެ މީހުންގެ އައިޑީކާޑުގެ މުއްދަތަކީ 10 އަހަރެވެ.
