ބޭންކް އޮފް މޯލްޑިވްސް (ބީއެމްއެލް)ގެ މުވައްޒަފެއް ކަސްޓަމަރުންގެ އެކައުންޓްތަކުން ފައިސާ ވަގަށް ނެގި މައްސަލައެއްގައި ކްރިމިނަލް ކޯޓުން ޙުކުމް ކޮށްފިއެވެ. މި މައްސަލައިގައި ދައުލަތުން ދަޢުވާ ކުރީ ބ. އޭދަފުށީ ހިޔާވަހި، އަލީ މާޒިންގެ މައްޗަށެވެ.
މާޒިން 2012 ގެ ސެޕްޓެމްބަރުން ފެށިގެން 2021 ގެ އޮކްޓޯބަރާ ހަމައަށް ބީއެމްއެލްގައި ވަޒީފާ އަދާކުރިއިރު، ކަސްޓަމަރުންގެ މަޢުލޫމާތު ސީއާރުއެމް ސިސްޓަމުން ބަދަލުކޮށް، ކަސްޓަމަރުންގެ ހުއްދަ ނެތި އިންޓަނެޓް ބޭންކިންގ ގައި ރަޖިސްޓްރީކޮށްފައިވެއެވެ. އޭނާ އެ އެކައުންޓްތަކުން 482,000 ރުފިޔާއަށް ވުރެ ގިނަ އަދަދެއް އޭނާގެ ކްރެޑިޓް ކާޑު ޕޭމަންޓްތަކާއި ފޮރެކްސް ޓްރާންސެކްޝަންތައް ހިންގުމަށް ބޭނުންކޮށްފައިވާކަމަށް ތުހުމަތު ކުރެވުނެވެ.
ކްރިމިނަލް ކޯޓުގެ ޙުކުމުގައިވާ ގޮތުން، މާޒިން ވަނީ ކޯޓުގައި ހިޔާނާތުގެ ދަޢުވާއަށް އިޢުތިރާފުވެފައެވެ. އެހެންކަމުން، އޭނާގެ މައްޗަށް އަދަބު ކަނޑައެޅީ ދައުލަތާއެކު ހަދާފައިވާ އިޢުތިރާފުގެ އެއްބަސްވުމުގެ ދަށުންނެވެ.
މި ކުށުގެ އަސްލު އަދަބަކީ 9 މަހާއި 18 ދުވަހުގެ ޖަލު ޙުކުމެއް ނަމަވެސް، އިޢުތިރާފުގެ އެއްބަސްވުމުގެ ދަށުން ކޯޓުން ވަނީ 56,200 ރުފިޔާގެ ޖޫރިމަނާއަކާއެކު 40 ގަޑިއިރު މުޖުތަމަޢަށް ޚިދުމަތްކުރުމަށް އަންގާފައެވެ. އަދި ޖޫރިމަނާގެ ފައިސާ 3 މަސްދުވަހުގެ ތެރޭގައި މީރާއަށް ދެއްކުމަށް ވަނީ ޙުކުމްކޮށްފައެވެ.
އިޢުތިރާފުގެ އެއްބަސްވުމުގައިވާ ގޮތުން މާޒިން ކޯޓުގައި ކުށަށް އެއްބަސްވުމާއެކު، ގެއްލުނު ފައިސާ ބޭންކަށް އަނބުރާ ދައްކަންޖެހޭނެއެވެ.
ބީއެމްއެލްއިން ބުނެފައިވާ ގޮތުގައި، މި މައްސަލަ ފެންމަތިވުމާއެކު އެ މީހާ ވަޒީފާއިން ވަކިކޮށް، ކަސްޓަމަރުންގެ އެކައުންޓުތަކުން ގެއްލުނު ފައިސާ ކަސްޓަމަރުންނަށް އަނބުރާ ދީފައިވާނެއެވެ. އަދި ގަވާއިދުތަކާ ޚިލާފަށް މުވައްޒަފުން ކުރާ ކަންކަމުގައި އަބަދުވެސް ފިޔަވަޅު އަޅާނެ ކަމަށް އެ ބޭންކުން ބުނެފައިވެއެވެ.
