ސްކޫލުތަކުގެ ޕީޓީއޭތަކުން އިސްނަގައިގެން، ދަރިވަރުންގެ މެދުގައި އީ-ސިގަރެޓް ބޭނުންކުރުން އިތުރުވަމުން ދިއުމާ ގުޅިގެން، ދުންފަތާއި ވޭޕް މަނާކުރުމަށް އެދި ޕެޓިޝަނެއް ތައްޔާރުކުރަން ފަށައިފިއެވެ.
އެނގިފައިވާ ގޮތުގައި މި ޕެޓިޝަނުގައި ބެލެނިވެރިންގެ ސޮއި ހޯދަމުންދަނީ، އީ-ސިގަރެޓްގެ ނުރައްކަލުން ޅަދަރިންނާއި ޒުވާން ޖީލު ރައްކާތެރިކުރުމަށް އެދި، ރައީސް ޑރ. މުޙައްމަދު މުޢިއްޒުއާއި ކަމާބެހޭ އިދާރާތަކުން ހަރުދަނާ ފިޔަވަޅު އެޅުމަށް ގޮވާލުމަށެވެ.
މި ޕެޓިޝަން ހުށަހެޅުމަށް އެޑިޔުކޭޝަން މިނިސްޓްރީން ވަނީ މިއަދު މެންދުރު 12:00 އާ ހަމައަށް ސްކޫލުތަކަށް މުއްދަތު ދީފައެވެ.
ޕެޓިޝަނުގައި ފާހަގަކޮށްފައިވާ ގޮތުގައި، ކިޔެވުމާއި ކުޅިވަރު އަދި މުނިފޫހިފިލުވުމުގެ މާޙައުލުތަކުގައި ދަރިވަރުން އެކަކު އަނެކަކަށް ވޭޕާއި ސިގަރެޓް ތަޢާރަފުކޮށް، އޭގެ ބޭނުންކުރުމަށް ނުފޫޒު ފޯރުވަމުންދާ ކަމަށް ބުނެފައިވެއެވެ. މީގެ ސަބަބުން އިޚްތިޔާރާ ނުލައިވެސް ގިނަ ކުދިން ވޭޕާއި އީ-ސިގަރެޓްގެ ނުރައްކަލަށް ހުށަހެޅިފައިވާ ކަމުގެ ކަންބޮޑުވުން ބެލެނިވެރިން ވަނީ ފާޅުކޮށްފައެވެ.
އަދި އީ-ސިގަރެޓް މެދުވެރިކޮށް ކުދިންނަށް މަސްތުވާތަކެތި ތަޢާރަފުވެ، އެ ތަކެތި ބޭނުންކުރަން ފެށުމުގެ ނުރައްކާ އޮތްކަމާއި، ކުދިންގެ ނާޒުކު ޅައުމުރުގައި މިފަދަ ތަކެތި ބޭނުންކުރުމުން ހެދިބޮޑުވުމާއި ސިއްޙަތަށް ގެއްލުންވެ، ކިޔެވުމަށް ނޭދެވޭ އަސަރުކުރަމުންދާ ކަމަށްވެސް ބެލެނިވެރިން ވަނީ ފާހަގަކޮށްފައެވެ.
