މުޅި ރާއްޖެ ހައި ސްޕީޑް ފެރީން ގުޅާލުމަށް ސަރުކާރުން ފަށާފައިވާ އާރްޓީއެލް ފެރީގެ ހިދުމަތް ސެޕްޓެމްބަރުމަހު ތެރޭގައި ބ. އަތޮޅުގައި ފަށާނެ ކަމަށް ސަރުކާރުން އިއުލާންކުރި އެވެ. ނަމަވެސް ސެޕްޓެމްބަރު މަސް ނިމުނު އިރު އެ މަސައްކަތް ފެށޭ ވަރެއް ނުވި އެވެ.
އާރުޓީއެލް ފެރީގެ ހިދުމަތް ސެޕްޓެމްބަރުމަހުތެރޭ ބ. އަތޮޅުގައި ފަށާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން އިއުލާން ކުރެއްވީ މިދިޔަ އޭޕްރިލް މަހުގެ 15 ވަނަ ދުވަހު ނޫސްވެރިންނަށް މައުލޫމާތު ދެއްވަމުންނެވެ.
އެ ބައްދަލުވުމުގައި މިނިސްޓަރު ވިދާޅުވީ އާރުޓީއެލް ފެރީގެ ހިދުމަތް ޖޫން މަހު ނ، އަތޮޅުގައި ޖޫންމަހު،. ރ. އަތޮޅުގައި އޯގަސްޓަ މަހު އަދި ބ. އަތޮޅުގައި ސެޕްޓެމްބަރުމަހު ފެށޭވަރު ވާނެ ކަމަށެވެ. މިދިޔަ ޖޫން މަހުގެ ތެރޭގައި ނ. އަތޮޅުގައި އާރުޓީއެލް ފެރީގެ ހިދުމަތް ވަނީ ފަށައިފަ އެވެ.
މިދިޔަ ސަރުކާރުގައި ފެށި އާރުޓީއެލްގެ ހިދުމަތް ނ، ރ އަދި ބ އަތޮޅަށް ފުޅާކުރުމަށް އެމްޓީސީސީއާ ހަވާލުކުރީ މިދިޔަ އޭޕްރިލް މަހު ތެރޭގަ އެވެ.
އާރުޓީއެލް ފެރީގެ ހިދުމަތް އެމްޓީސީސީއާ ހަވާލުކޮށްފައި އޮތީ ޑިޒައިން، ބިލްޑް އެންޑް އޮޕަރޭޓް ކުރާ ގޮތަށެވެ.
އާރުޓީއެލްގެ ޚިދުމަތް ދިހަ އަތޮޅެއްގައި މިހާރު އަންނަނީ ދެމުންނެވެ. އެއީ، ޒޯން 1 ގެ ހއ، ހދ، ށ. އާއި ޒޯން 2 ގެ ނ، ޅ. އާއި، ޒޯން 5 ގއ، ގދ. އަދި ޒޯން 6 ގެ ޏ، އާއި ސ. އަތޮޅުގަ އެވެ.
