އުރީދޫ މޯލްޑިވްސް އިން އިސްރަށްވެހިންގެ ނާދީއާ ގުޅިގެން ބައިނަލްއަޤްވާމީ އިސްރަށްވެހިންގެ ދުވަސް ކުލަގަދަކޮށް ފާހަގަކޮށްފިއެވެ. މިގޮތުން ކުރިއަށް ގެންދިޔަ ހަރަކާތްތަކުގެ ތެރޭގައި “ގްރޯ ވިތް އުރީދޫ” ސެޝަނަކާއި، ޑިޖިޓަލް ޕާޓްނަރޝިޕެއް އިޢުލާންކުރުމާއި، ފޮތް ހަދިޔާކުރުން ހިމެނެއެވެ.
މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓާ ގުޅިގެން ބޭއްވި “ގްރޯ ވިތް އުރީދޫ” ސެޝަނުގައި ގޯތިތެރޭގައި ގަސްއިންދުމުގެ ޓެކްނިކްތައް އުނގަންނައިދީފައިވެއެވެ. މި ސެޝަން ނަގައިދީފައިވަނީ އުރީދޫގެ އެމްބަސެޑަރ ރަމްޒީ ހުސައިން (ޒުވާން ދަނޑުވެރިޔާ) އެވެ.
އުރީދޫއިން ވަނީ އިސްރަށްވެހިންގެ ނާދީއާއެކު އައު ޑިޖިޓަލް ޕާޓްނަރޝިޕެއް ވެސް އިޢުލާންކޮށްފައެވެ. މި ޕާޓްނަރޝިޕްގެ ދަށުން އުރީދޫގެ ޓެލެކޮމިއުނިކޭޝަން އަދި ޑިޖިޓަލް ޚިދުމަތްތައް އިސްރަށްވެހިންނަށް ފަސޭހައިން ލިބޭނެއެވެ.
މީގެއިތުރުން، އުރީދޫއިން ވަނީ އިސްރަށްވެހިންގެ ނާދީއަށް ފޮތްތަކެއް ހަދިޔާކޮށްފައެވެ. މި ހަދިޔާގެ ސަބަބުން އިސްރަށްވެހިންނަށް ނާދީގައި ހޭދަކުރާ ވަގުތުތަކުގައި އެކި މައުޟޫޢުތަކުގެ ފޮތްތައް ކިޔުމުގެ ފުރުޞަތު ލިބިގެންދާނެއެވެ.
އުރީދޫއިން ބުނީ މިއީ މުޖުތަމަޢުގައި އިސްރަށްވެހިންގެ ބައިވެރިވުން އިތުރުކުރުމަށް މިއަހަރު ފެށި ޕްރޮގްރާމުގެ ބައެއް ކަމަށެވެ. އަދި ޑިޖިޓަލް އިންކްލޫޝަން، ދެމެހެއްޓެނިވިކަން އަދި މުޖުތަމަޢުގެ ބައިވެރިވުން އިތުރުކުރުމަށް އައު ގޮތްތަކާއި ޕާޓްނަރޝިޕްތައް މެދުވެރިކޮށް މުޖުތަމަޢުގެ ހުރިހާ ދާއިރާއަކަށް އެހީތެރިކަން ފޯރުކޮށްދިނުމަށް އުރީދޫއިން އަބަދުވެސް މަސައްކަތްކުރަމުންދާ ކަމަށް ބުންޏެވެ.
