އަންނަ އަހަރުގެ ދައުލަތުގެ ބަޖެޓް ދިރާސާކުރުމުގެ މަސައްކަތް މި މަހުގެ 20 ވަނަ ދުވަހުގެ ނިޔަލަށް ނިންމުމަށް މިއަދު ބަޖެޓް ކޮމިޓީން ނިންމައިފިއެވެ.
މިއަދުގެ ބައްދަލުވުމުގައި ފުވައްމުލަކު މެދު ދާއިރާގެ މެންބަރު އަލީ ފަޟާދު މުގައްރިރު ކަމަށާއި، އޭދަފުށީ ދާއިރާގެ މެންބަރު އަޙްމަދު ސަލީމް ނައިބު މުގައްރިރުކަމަށް ވަނީ ހަމަޖައްސައިފަ އެވެ.
ކޮމިޓީން މިއަދު އެކުލަވާލި ޓައިމްލައިންގެ ދަށުން، އޮޑިޓަރ ޖެނެރަލްގެ އޮފީހާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބަޖެޓާ ގުޅޭ ބަޔާން ހުށަހެޅުމަށް އެދުމަށާއި، މިނިވަން މުއައްސަސާތަކާއި ވަކިވަކި އޮފީސްތަކުގެ ބަޖެޓުގެ ތަފްސީލު ހޯދުމަށް އިދާރާތަކަށް ސިޓީ ފޮނުވުމަށްވެސް ވަނީ ނިންމާފައެވެ.
އަންނަ އަހަރަށް ލަފާކުރާ 57 ބިލިއަން ރުފިޔާގެ ދައުލަތުގެ ބަޖެޓް މަޖިލީހަށް ހުށަހެޅީ މިދިޔަ ހަފުތާގެ ބުރާސްފަތި ދުވަހުއެވެ. މި ބަޖެޓުގައި އާމްދަނީގެ ގޮތުގައި 39.8 ބިލިއަން ރުފިޔާ ލިބޭނެކަމަށް ލަފާކޮށްފައިވާއިރު، ރިކަރަންޓް ޚަރަދުގެ ގޮތުގައި މުޅި ބަޖެޓުގެ 64 ޕަސެންޓް ކަމަށްވާ 36 ބިލިއަން ރުފިޔާއާއި، ކެޕިޓަލް ޚަރަދުގެ ގޮތުގައި 13.4 ބިލިއަން ރުފިޔާ ހިމަނާފައިވެއެވެ.
