ޅ. އަތޮޅުގައި ބަޔޮސްފިއާ ރިޒާވެއް ޤާއިމުކުރުމަށް ބޭނުންވާ މަޢުލޫމާތު ހޯދުމަށް ސާވޭކުރުމުގެ މަސައްކަތް އަންނަ އަހަރު ފަށާނެކަމަށް ތިމާވެއްޓާ ބެހޭ މިނިސްޓަރު ތޯރިގް އިބްރާހިމް މިއަދު ވިދާޅުވެއްޖެ އެވެ.
މިނިސްޓަރު ވިދާޅުވީ ރާއްޖޭގައި އިތުރު ބަޔޯސްފިއާ ރިޒާވް ޤާއިމުކުރުމަށް މިއަހަރު ހުޅުވާލި ފުރުޞަތުގައި ޕްރޮޕޯސަލް ހުށައަޅާފައިވަނީ ހަމައެކަނި ޅ. އަތޮޅުންނެވެ. އަދި އެ ޕްރޮޕޯސަލް ފުރިހަމަކަންވެސް މިނިސްޓަރު ފާހަގަކުރެއްވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެއްގެ ގޮތުގައި، ކުރިއަށް އޮތް 5 އަހަރުގެ ތެރޭގައި ރާއްޖޭގައި އިތުރު 3 ބަޔޮސްފިއަރ ރިޒާވް އާއި އިތުރު ނޭޗަރ ޕާކުތައް ޤާއިމުކުރުން ހިމެނެއެވެ. މި މަޝްރޫޢުގެ ދަށުން، އަންނަ އަހަރު ޅ. އަތޮޅުގައި ބަޔޮސްފިއަރ ރިޒާވަށް ބޭނުންވާ ސަރވޭތަކާއި ދިރާސާތައް ފެށިގެންދާނެ ކަމަށް މިނިސްޓަރު ވިދާޅުވެފައިވެއެވެ.
މިނިސްޓަރު ވިދާޅުވި ގޮތުގައި، އަންނަ އަހަރުގެ ތެރޭގައި ސާވޭގެ މަސައްކަތް ފެށުމަށްފަހު، ދޮޅު އަހަރުގެ ތެރޭގައި އެޕްލިކޭޝަންގެ ހުރިހާ މަސައްކަތެއް ނިންމައި، ޔުނެސްކޯގެ ބަޔޮސްފިއާ ރިޒާވްގައި ހިމެނުމަށް ހުށަހެޅިގެންދާނެއެވެ. އަދި މި މަސައްކަތަށް ބޭނުންވާ ފައިސާ މިހާރު ހަމަޖެހިފައިވާ ކަމަށްވެސް މިނިސްޓަރު ވިދާޅުވި އެވެ.
ރާއްޖޭގައި ޔުނެސްކޯގެ ބަޔޮސްފިއަރ ރިޒަރވެއްގެ ގޮތުގައި ކަނޑައަޅާފައިވަނީ ބ. އަތޮޅާއި، އައްޑޫ ސިޓީއާއި ފުވައްމުލައް ސިޓީއެވެ. ބަޔޮސްފިއާ ރިޒާވެއްގެ ގޮތުގައި ހަމަޖެހިގެން ދިޔުމުން، ގުދުރަތީ ރީތިކަން ލިބިފައިވާ ސަރަޙައްދުތައް ޙިމާޔަތްކޮށް ބެލެހެއްޓުން ހަރުދަނާކުރުމަށް ބާރުއަޅަން މަގުފަހިވެގެންދާނެ އެވެ.
ބަޔޮސްފިއާ ރިޒާވެއްގެ ގޮތުގައި ސަރަޙައްދެއް ކަނޑައަޅަނީ 10 އަހަރުގެ މުއްދަތަށެވެ. އަދި އެ މުއްދަތު ހަމަވުމުން، އަލުން އެގޮތުގައި އެ ސަރަޙައްދެއް ދެމެހެއްޓުމަށް، އެ ސަރަޙައްދަކާ ގުޅޭގޮތުން ސާވޭތަކެއް ކުރުމަށްފަހު ޔުނެސްކޯއަށް ހުށަހަޅަން ޖެހެއެވެ.
ބަޔޮސްފިއަރ ރިޒާވެއްގެ ގޮތުގައި ވަކި ސަރަޙައްދެއް ކަނޑައަޅައި އެގޮތުގައި ދެމެހެއްޓުމަށް އެ ސަރަޙައްދެއްގެ އެކި މުވައްސަސާތަކާއި ރައްޔިތުންގެ ހިއްސާ ބޮޑުވެގެންދެއެވެ. މިއީ ރާއްޖޭގެ ފަތުރުވެރިކަމަށާއި ތިމާވެއްޓަށް ރަނގަޅު ކުރިއެރުންތަކެއް ގެނުވާނެ ކަމެކެވެ.
