އަންނަ އަހަރުގެ ރޯދަމަހު ވެސް ރޯދަ ހަދިޔާގެ ގޮތުގައި ސަރުކާރުގެ ފަރާތުން މަސްދަޅު ބަހަން ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށް ލޯކަލް ގަވަމަންޓް މިނިސްޓްރީން މިއަދު ބުނެފި އެވެ.
އަންނަ އަހަރުގެ ފެބްރުއަރީ މަހުގެ ތެރޭގައި ރޯދަ މަސް ފެށޭތީ ރޯދަ ހަދިޔާ ރާއްޖޭގެ ހުރިހާ ގޭބިސީއަކަށް ވެސް ދޭން ތައްޔާރީތައް ވާން މިހާރު ވަނީ ފަށައިފަ އެވެ. އެގޮތުން ރަށްރަށުގެ ކައުންސިލްތަކުން މިހާރު އަންނަނީ ގޭބިސީތަކުގެ އެންމެ ފަހުގެ މައުލޫމާތު އަދާހަމަކުރުމަށް އަންގަމުންނެވެ.
މި އަހަރު ވެސް ރޯދަ ހަދިޔާގެ ގޮތުގައި ކޮންމެ ގޭބިސީއަކަށް ދީފަައި ވަނީ މިފްކޯގެ ތެޔޮމަސް ދަޅު ކޭހެވެ. އެއީ ކޮންމެ ގޭބިސީއަކަށް 48 ދަޅު ހިމެނޭ 100 ގްރާމްގެ މަސްދަޅު ކޭހެވެ. މިކަމަށް ދައުލަތުގެ ބަޖެޓުން 111.8 މިލިއަން ރުފިޔާ ހަރަދުކުރި އެވެ.
