އުރީދޫއަށް ދެވަނަ ކުއާޓަރުގައި 169 މިލިއަން ރުފިޔާގެ ސާފު ފައިދާ ލިބިއްޖެ

އުރީދޫ މޯލްޑިވްސްއަށް މި އަހަރުގެ ދެވަނަ ކުއާޓަރުގައި 169 މިލިއަން ރުފިޔާގެ ސާފު ފައިދާ ލިބިފައިވާ ކަމަށް، އެ ކުންފުނިން މިއަދު އާންމުކުރި މާލީ ހިސާބުތަކުން ދައްކައިފި އެވެ.

އެ ކުންފުނިން އާންމުކުރި މާލީ ހިސާބުތައް ދައްކާ ގޮތުން، މި އަހަރުގެ ދެވަނަ ތިން މަސް ދުވަހު ސާފު ފައިދާގެ ގޮތުގައި ލިބުނު 169 މިލިއަން ރުފިޔާއަކީ، މިދިޔަ އަހަރުގެ އެ މުއްދަތުގައި ލިބުނު 174 މިލިއަން ރުފިޔާއާ އަޅާބަލާއިރު %3 ދަށް އަދަދެކެވެ.

ދެވަނަ ކުއާޓަރުގެ ފައިދާ ފުރަތަމަ ކުއާޓަރާ އަޅާބަލާއިރު ދަށް ނަމަވެސް، މިދިޔަ އަހަރާ އަޅާބަލާއިރު މި އަހަރުގެ ފުރަތަމަ ހަ މަހު އުރީދޫއަށް ލިބުނު ސާފު ފައިދާ ވަނީ %0.5 އިތުރުވެފަ އެވެ. އެގޮތުން، މި އަހަރުގެ ފުރަތަމަ ހަ މަހު އުރީދޫއަށް ސާފު ފައިދާގެ ގޮތުގައި ޖުމްލަ 338 މިލިއަން ރުފިޔާ ލިބުނު އިރު، މިދިޔަ އަހަރުގެ އެ މުއްދަތުގައި ލިބުނީ 336 މިލިއަން ރުފިޔާ އެވެ.

މި އަހަރުގެ ދެވަނަ ކުއާޓަރުގައި އުރީދޫއަށް ޖުމްލަ އާމްދަނީގެ ގޮތުގައި 539 މިލިއަން ރުފިޔާ ލިބުނު އިރު، މިދިޔަ އަހަރުގެ އެ މުއްދަތުގައި ލިބުނީ 541 މިލިއަން ރުފިޔާ އެވެ. މި ދެވަނަ ކުއާޓަރުގައި މޮބައިލް ހިދުމަތްތަކުން 399 މިލިއަން ރުފިޔާ ލިބުނުއިރު، ފިކްސްޑް ބްރޮޑްބޭންޑް އަދި އެންޓަޕްރައިޒް ހިދުމަތްތަކުން ވަނީ 139 މިލިއަން ރުފިޔާ ލިބިފަ އެވެ.

އުރީދޫ މޯލްޑިވްސްގެ ސީއީއޯ ހާލިދު އަލް ހަމަދީ ވިދާޅުވީ، މި އަހަރުގެ ދެވަނަ ކުއާޓަރުގައި ވެސް އެ ކުންފުނިން އިނޮވޭޝަން އަދި ސަސްޓެއިނަބަލް ގްރޯތުގެ ދާއިރާއިން ގިނަ އިންވެސްޓުމެންޓުތަކެއް ކުރި ކަމަށެވެ.

އުރީދޫން ރާއްޖޭގައި ހިދުމަތް ދޭތާ 20 އަހަރު ވީއިރު، އަބަދުވެސް މަސައްކަތް ކުރަނީ ކަސްޓަމަރުންގެ ތަޖުރިބާ ފުރިހަމަކޮށް ފެންވަރު ރަނގަޅު ހިދުމަތްތަކެއް ފޯރުކޮށްދިނުމަށް ކަމަށް ވެސް އޭނާ ވިދާޅުވި އެވެ.