އޭދަފުށި ކުޅުނު އެކުވެރިކަމުގެ ދެވަނަ މެޗު ކާމިޔާބުކޮށްފި

ބ. އެޓޯލް ފުޓްބޯލް ޗެލެންޖަށް ތައްޔާރުވުމުގެ ގޮތުން މިއަދު ހަވީރު އޭދަފުށީ ރަސްމީ ފުޓްބޯޅަ ދަނޑުގައި ފެހެންދޫއާއި ބައްދަލުކުރި މެޗު އޭދަފުށިން ކާމިޔާބުކޮށްފިއެވެ.

މުބާރާތުގައި އެއްގުރޫޕެއްގައި ހިމެނޭ މި ދެޓީމުގެ ކުރިމަތިލުން ނިމުނީ 2-1 އިންނެވެ. މެޗު ފެށިގެން ލީޑު ނެގީ އޭދަފުށީ ޓީމުންނެވެ. މި ގޯލް ކާމިޔާބު ކުރީ މުޙައްމަދު ފާސިރެވެ.

ދެވަނަ ހާފް ފަށައިގެން މާގިނަ އިރުތަކެއް ނުވެ ފެހެންދޫން ނަތީޖާ އެއްވަރު ކުރިއެވެ. ފެހެންދޫއަށް ގޯލް ޖަހައިދިނީ ލިބުނު ހިލޭ ޖެހުމަކުން އަޙްމަދު ނިޒާމް (ނިޒާމްބެ) އެވެ. މޮޅުވި ލަނޑު އޭދަފުށިން ޖަހާފައިވަނީ މެޗް ނިމެން ދަނިކޮށެވެ. މި ލަނޑުވެސް އެޓީމަށް ޖަހައިދިނީ މިއަދުގެ މެޗްގައި ކުރިއަށް ކުޅެމުންދިޔަ މުޙައްމަދު ފާސިރެވެ.

 

މިއަދުގެ މެޗްގައި ގައުމީ ޓީމްގެ ޑިފެންޑަރ ރިލްވާން ވަހީދު ވަނީ އޭދަފުށީ ޓީމަށް ކުޅެފައެވެ. މެޗްގައި ގިނަ ވަގުތު ބޯޅަ ހިފަހައްޓައިގެން ކުޅެފައިވަނީ އޭދަފުއްޓެވެ. ނަމަވެސް ފެހެންދޫން ވަނީ މެޗްގައި ރަނގަޅު ވާދައެއްކޮށްފައެވެ. މިގޮތުން ދެވަނަ ހާފްގައި ލީޑުނަގަން ރަނގަޅު ފުރުޞަތެއް ފެހެންދޫއަށް ވަނީ ލިބިފައެވެ.

ބ. އެޓޯލް ފުޓްބޯލް ޗެލެންޖު ފެށުމަށް ހަމަޖެހިފައިވަނީ އަންނަ ހޮނިހިރު ދުވަހުއެވެ. މުބާރާތުގައި އޭދަފުށި ކުޅޭ ފުރަތަމަ މެޗްގައި އަންނަ އާދިއްތަ ދުވަހު ހަވީރު ކުޅޭނީ ދޮންފަނާއެވެ. މި މުބާރާތުގައި އަތޮޅުގެ 7 ރަށަކުން ވަނީ ބައިވެރިވެފަ އެވެ.