ދުނިޔޭގެ އެންމެ ކުރި އަރާފައިވާ މޮބައިލް ނެޓްވޯކް ކަމަށްވާ ފޯޖީ އެލްޓީއީ އޭ ނެޓްވޯކް ކުޅުއްދުއްފުށީގައި ތައާރަފުކޮށްފި އެވެ.
ކުޅުދުއްފުށީގައި ޖަލާލުއްދީން ސްކޫލްގައި އިއްޔެ ބޭއްވި ހާއްސަ ރަސްމިޔާތެއްގައި މި ހިދުމަތް ތައާރަފުކޮށްދެއްވީ ދިރާގުގެ ޗީފް އެގްޒެކެޓިވް އިސްމާޢީލް ރަޝީދެވެ.
ހަލުވިކަމާއެކު އިންޓަނެޓުގެ ހިދުމަތް ލިބޭ ފޯޖީ ނެޓްވޯކު އެ ކުންފުނިން ކުޅުދުއްފުއްޓަށް ތައާރަފުކުރިއިރު، މިދިޔަ ހަފުތާގައި މި ހިދުމަތް ގދ. ތިނަދޫއަށާއި އެއަތޮޅު ވިލިނގިލީގައި ވެސް ވަނީ ތައާރަފުކޮށްފަ އެވެ.
އެ ކުންފުނިން ބުނީ މިއީ ރާއްޖޭގެ މުވާސަލާތީ ހިދުމަތުގައި ހޯދުނު ވަރަށް ބޮޑު ކުރިއެރުމެއް ކަމަށެވެ. އަދި މި ހިދުމަތް ރާއްޖޭގެ އެހެން ކަންކޮޅުތަކަށް ފުޅާކުރުމަށް އެ ކުންފުނިން މަސައްކަތްކުރަމުން އަންނަ ކަމަށާއި ކައިރި މުސްތަގުބަލެއްގައި ރާއްޖޭގެ އިތުރު ސަރަހައްދުތަކަށް ވެސް ފޯޖީގެ ހިދުމަތް ދޭން ފަށާނެ ކަމަށް ދިރާގުން ބުންޏެވެ.
ދިރާގުން ބުނީ ފޯޖީގެ ހިދުމަތް ދިނުމަށް އެ ކުންފުނިން ތައާރަފުކޮށްފައިވާ ޔޫސިމްއަކީ މުޅިން އަލަށް ރާއްޖޭގައި ބޭނުންކުރަމުން އަންނަ ޓެކްނޮލޮޖީއެއް ކަމަށެވެ. އެ ކުންފުނިން ވަނީ ކުޅުދުއްފުއްޓަށް ފޯޖީ ތައާރަފުކުރުމަށް ބޭއްވި ރަސްމިއްޔާތަށް ދައުވަތު އެރުވިގެން ވަޑައިގެންނެވި ފަރާތްތަކަށް ޔޫސިމް އެއް ހަދިޔާކޮށްފަ އެވެ.
