ބ. ދަރަވަންދޫގެ ނަރުދަމާގެ ނިޒާމު ގާއިމްކުރުމުގެ މަސައްކަތުގެ 85 ޕަސެންޓު ނިމިއްޖެ އެވެ.
އެމްޑަބްލިޔުއެސްސީން ބުނީ ދަރަވަންދޫގެ ނަރުދަމާ ނިޒާމުގެ މަސައްކަތް ބާރު ސްޕީޑެއްގައި ކުރިއަށްދާ ކަމަށާއި އެގޮތުން މި މަޝްރޫއުގެ 85 ޕަސެންޓް މިހާރު ނިމިފައިވާ ކަމަށެވެ.
މި މަޝްރޫއުގެ ދަށުން ދަރަވަންދޫގައި މިހާރު ކުރިޔަށްދަނީ ޕަންޕް ސްޓޭޝަން ގާއިމްކުރުމުގެ މަސައްކަތެވެ.
އެމްޑަބްލިޔުއެސްސީން ބުނި ގޮތުގައި މި މަޝްރޫއުގެ ދަށުން ދަރަވަންދޫގައި 9.54 ކިލޯ މީޓަރުގެ ދިގު ނަރުދަމާ މައި ނެޓްވޯކް ގާއިމުކޮށް، 780 މީޓަރުގެ ޕަންޕިން ލައިން އަޅާނެ އެވެ. އަދި ތިން ޕަންޕިން ސްޓޭޝަނާއި, ސީ އައުޓް ފޯލް ގާއިމު ކުރުމާއި، ގޭގޭގައި ޖަންކްޝަން ބަހައްޓައި ނަރުދަމާ ކަނެކްޝަން ގުޅައިދީ އެ ގެތަކަށް ނަރުދަމާގެ ހިދުމަތް ފޯރުކޮށްދޭނެ އެވެ. މީގެ އިތުރުން ނަރުދަމާ ނިޒާމު ހިންގައި، ބެލެހެއްޓުމަށް ބޭނުންވާ ވެހިކަލް ފޯރުކޮށްދިނުމަށް ވެސް ވަނީ ހަމަޖެހިފަ އެވެ.
ދަރަވަންދޫގެ ނަރުދަމާގެ މަޝްރޫއަށް 49.1 މިލިއަން ރުފިޔާ ހަރަދުވާނެ ކަމަށް އެމްޑަބްލިޔުއެސްސީން ބުނެ އެވެ.
