މުވައްޒަފެއްގެ އިހުމާލުން ކަސްޓަމަރުންނަށް މާލީ ގެއްލުމެއް ނުވާނެކަމަށް ބޭންކް އޮފް މޯލްޑިވްސް (ބީއެމްއެލް) އިން މިއަދު ބުނެފިއެވެ.
މި ބަޔާން އައިސްފައިވަނީ ބީއެމްއެލްގެ ކަސްޓަމަރ ސަރވިސް އެސިސްޓެންޓެއް ކަސްޓަމަރުންގެ އެކައުންޓުތަކުގައި ހުރި ފައިސާއަށް ޚިޔާނާތްތެރިވި މައްސަލައެއްގައި ކްރިމިނަލް ކޯޓުން އިއްޔެ ހުކުމްކުރުމާ ގުޅިގެންނެވެ.
ބީއެމްއެލް އިން ބުނީ، އެ މައްސަލަ ބޭންކަށް ފާހަގަވުމާ އެކު، ބަލަން ޖެހޭ ކަންކަން ބެލުމަށް ފަހު، އެ މުވައްޒަފު ވަޒީފާ އިން ވަކިކުރި ކަމަށެވެ.
ބީއެމްއެލްގެ ހެޑް އޮފް ޕަބްލިކް ރިލޭޝަންސް މުޙައްމަދު ސަޢީދު ވިދާޅުވީ 2021 ވަނަ އަހަރު ހިނގި މި މައްސަލަ ބޭންކަށް ފާހަގަވުމާއެކު އެ މުވައްޒަފު ވަގުތުން މަސައްކަތުން އެކަހެރިކުރި ކަމަށެވެ. މުވައްޒަފު ވަނީ އޭނާ އަދާކުރާ ވަޒީފާގެ ގޮތުން ލިބިފައިވާ ބާރުގެ ބޭނުން ނަހަމަ ގޮތުގައި ހިފައި ކަސްޓަމަރުންގެ އެކައުންޓުން ފައިސާ ނަގައި އަމިއްލައަށް ބޭނުންކޮށްފައެވެ.
މައްސަލަ ބެލުމަށްފަހު އެ މުވައްޒަފު މަޤާމުން ވަކިކޮށް، 2021 ޑިސެމްބަރު 7 ގައި މައްސަލަ ފުލުހުންނަށް ހުށަހެޅުނެވެ. އަދި ކަސްޓަމަރުންގެ އަތުން ގެއްލުނު ފައިސާ ބޭންކުން ކަސްޓަމަރުންނަށް ޖަމާކޮށްދީފައިވާ ކަމަށް ބީއެމްއެލް އިން ބުންޏެވެ.
ބީއެމްއެލް އިން ބުނިގޮތުގައި، އެ ބޭންކުގެ އެތެރޭގައި މުވައްޒަފުން އަމަލުކުރާނެ ހަރުދަނާ އުސޫލުތަކާއި ގަވާއިދުތަކެއް ވަނީ ކަނޑައަޅައިފަ އެވެ. އެ ގަވާއިދުތަކާ ހިލާފު އަމަލެއް ކޮށްފި ނަމަ ވަގުތުން ބޭންކުގައި ލޮގްކޮށް، އިންޓާނަލް ކޮންޓްރޯލްތަކުން އެކަން ދެނެގަނެވޭނެ ކަމަށް ބުންޏެވެ.
ބޭންކުގެ އެއްވެސް މުވައްޒަފަކު ގަވާއިދާ ޚިލާފު ކަމެއް ކޮށްފި ނަމަ އެކަމެއް ތަޙުޤީޤުކޮށް އަޅަން ޖެހޭ އެންމެ ހަރުކަށި ފިޔަވަޅު އަބަދުވެސް އަޅާނެ ކަމަށް ވެސް ބޭންކުން ބުންޏެވެ.
ބީއެމްއެލްގެ ބަޔާނުގައި ބުނީ އެ ބޭންކުގެ މުވައްޒަފެއްގެ އިހުމާލުން ނުވަތަ ގަވާއިދާ ހިލާފަށް ކުރާ އަމަލަކުން ކަސްޓަމަރުންނަށް އެއްވެސް މާލީ ގެއްލުމެއް ނުލިބޭނެ ކަމުގެ ޔަގީންކަން ދޭ ކަމަށެވެ.
