
އަމިއްލަ ކުންފުންޏަކުން ބ. ފެހެންދޫގައި ހެއްދި މޫދުވިނަ އެކްސްޕޯޓްކުރަން ތައްޔާރުވެއްޖެ އެވެ.
މި މަޝްރޫއު ފެހެންދޫގައި ފެށީ މި އަހަރުގެ ކުރީކޮޅުގަ އެވެ.
ރާއްޖޭގައި ވިޔަފާރީގެ ބޭނުމަށް މޫދުވިނަ އާލާކުރަން ފެށި ފުރަތަމަ މަޝްރޫއު މިދިޔަ ފެބްރުއަރީ މަހު އިފްތިތާހުކޮށްދެއްވީ މިނިސްޓަރު ޝިޔާމެވެ. މިއީ ރާއްޖޭގެ މެރިކަލްޗާ ސިނާއަތަށް އާ ދޮރެއް ހުޅުވައިދޭނެ މަސައްކަތެއް ކަމަށް ސަރުކާރުން ވަނީ ފާހަގަކޮށްފަ އެވެ.
މިނިސްޓަރު ޝިޔާމް އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ، މީގެ 8 މަސްދުވަސް ކުރިން ފެށި މި މަޝްރޫއު ވަރަށް ކާމިޔާބު ކަމަށާއި، މިހާރު ރާއްޖެއިން ބޭރަށް މޫދުވިނަ އެކްސްޕޯޓްކުރަން އެ ކުންފުނިން ތައްޔާރުވެފައިވާ ކަމަށެވެ.
“މީގެ 8 މަސްދުވަސް ކުރިން ފެހެންދޫގައި ފެށި މި މަޝްރޫއު، ރާއްޖޭގައި ކާމިޔާބުކަމާ އެކު މޫދުވިނަ އާލާކޮށް، އެކްސްޕޯޓް ކުރުމަށް ތައްޔާރުވެއްޖެ. އެކަމަށްޓަކައި ފްލޯޓިން އޭކާސް ޕްރައިވެޓް ލިމިޓެޑާއި ޓީމަށް ތަހުނިޔާ ދަންނަވަން،” މިނިސްޓަރު ވިދާޅުވި އެވެ.
މިނިސްޓަރު ޝިޔާމް އިތުރަށް ވިދާޅުވީ، މިއީ ރައީސް ޑރ. މުހައްމަދު މުއިއްޒު ގެންގުޅުއްވާ ނޫ އިގުތިސާދާއި ދެމެހެއްޓެނިވި ގޮތެއްގައި ކަނޑުން ލިބޭ ނަފާ އިތުރުކުރުމުގެ ސިޔާސަތަށް ވެސް ލިބުނު ބޮޑު ކުރިއެރުމެއް ކަމަށް ގަބޫލުކުރައްވާ ކަމަށެވެ. ފެހެންދޫގައި އާލާކުރި މޫދުވިނައަކީ ކާތަކެތި ތައްޔާރުކުރުމަށާއި ބޭހާއި ކޮސްމެޓިކްސްގެ އެކި ބާވަތްތައް އުފެއްދުމަށް ބޭނުންކުރާ ބާވަތެކެވެ. އެކްސްޕޯޓްކުރުމަށް ހަމަޖެހިފައިވަނީ މި މޫދުވިނަ ހިއްކައިގެންނެވެ.
މެރިކަލްޗާގެ ސިނާއަތަކީ ދިވެހިންނަށް އިގްތިސާދީ ގޮތުން ފައިދާހުރި ސިނާއަތަކަށް ހެދުމަކީ ރައީސް މުއިއްޒުގެ މުހިންމު ވައުދެކެވެ. މި ކާމިޔާބީއާ އެކު، ރާއްޖޭގެ އިގްތިސާދަށް އާ އާމްދަނީގެ މަގުތަކެއް ހުޅުވިގެންދާނެ ކަމަށް ބެލެވެ އެވެ.

