ބ. އަތޮޅު ހޮސްޕިޓަލުގެ އާ އިމާރާތުގެ ބިންގާ އަޅައިފި

ބ. އަތޮޅު ހޮސްޕިޓަލުގެ އާ އިމާރާތުގެ ބިންގާ އަޅައިފި އެވެ. 

މި ރަށުގައި މިއަދު މެންދުރުފަހު ބޭއްވި ރަސްމިއްޔާތުގައި، 18 މަސް ދުވަހުގެ ތެރޭގައި ނިންމަންޖެހޭ އެ އިމާރާތުގެ ބިންގާ އަޅުއްވައިދެއްވީ ހެލްތު މިނިސްޓަރު އަބްދުﷲ ނާޒިމް އިބްރާހީމެވެ.

މިއަތޮޅުގެ އެތައް ބަޔަކު ހިދުމަތް ހޯދާ ބ. އަތޮޅު ހޮސްޕިޓަލްގެ އާ އިމާރަތް އަޅަން މިދިޔަ އޯގަސްޓް މަހުގެ ތެރޭގައި 181.7 މިލިއަން ރުފިޔާއަށް ހަވާލުކުރީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ އެވެ.

މިއަދުގެ ރަސްމިއްޔާތުގައި މިނިސްޓަރު ނާޒިމު ވިދާޅުވީ، މިއަދު ބ. އަތޮޅު ހޮސްޕިޓަލުގެ އާ އިމާރާތަކީ މިރަށުގެ ރައްޔިތުން އެތައް ދުވަހެއް ވަންދެން ސަރުކާރުގެ ފަރާތުން އެދެމުން ދިޔަ މަޝްރޫއެއް ކަމަށެވެ. އަދި މިރަށުގައި 50 އެނދުގެ މުޅިން އާ ހޮސްޕިޓަލެއް ތަރައްގީވެގެން ދިއުމަކީ، މިރަށުގެ ރައްޔިތުންނަށް އަދި މުޅި މި ސަރަހައްދުގެ ރައްޔިތުންނަށްވެސް ވަރަށް ގިނަ ފައިދާތަކެއް ލިބިގެންދާނެ ކަމެއް ކަމަށް މިނިސްޓަރު ވިދާޅުވި އެވެ.

ހޮސްޕިޓަލުގެ އާ އިމާރާތުގެ މަސައްކަތް ނިމުމުން އާބަން ސެންޓަރުތަކުގައި ހުންނަންވާ ފެންވަރަށް ސިއްހީ ހިދުމަތް އޭދަފުށިން ލިބޭނެ ކަމަށް ރައީސް މުއިއްޒު ކުރިން ވަނީ ވިދާޅުވެފަ އެވެ.

ބ. އަތޮޅު ހޮސްޕިޓަލުގެ އާ އިމާރަތް ހަދަނީ، މިހާރު ހުރި އިމާރާތަށްވުރެ ބޮޑުކޮށް ރަށުގެ ދެކުނު ފަރާތުގެ ހިއްކި ބިމުގައެވެ. އާ އިމާރާތް އެޅުމަށް އެ ސަރައްދުންވަނީ 70،000 އަކަފޫޓްގެ ބޮޑު ބިމެއް ހަމަޖައްސައިދީފަ އެވެ.