ސްރީ ލަންކާ އަށް އެރި ބާރުގަދަ ތޫފާން “ދީތުވާ” ގެ ސަބަބުން އެ ގައުމަށް ލިބެމުންދާ ބޮޑެތި ގެއްލުންތަކާ ގުޅިގެން، އެހީތެރިކަން ފޯރުކޮށްދިނުމުގެ ގޮތުން ދައުލަތުގެ މީޑިއާ، ޕަބްލިކް ސާވިސް މީޑިއާ (ޕީއެސްއެމް) އިން އިސްނަގައިގެން ޓެލެތޯނެއް ބާއްވަން ނިންމައިފި އެވެ.
މި ޓެލެތޯން ކުރިއަށް ގެންދަން ހަމަޖެހިފައި ވަނީ މާދަމާ ހެނދުނު ނުވައަކުން ފެށިގެން، މާދަމާ ރޭގެ މެންދަމު އެކެއް ޖަހަންދެނެވެ.
ޕީއެސްއެމުން މިއަދު ބުނި ގޮތުގައި، ލަންކާއަކީ ޒަމާނުއްސުރެ ދިވެހިންނާ އެންމެ ގާތް ގުޅުން އޮންނަ އަދި އެންމެ ކައިރީގައި އޮތް އަވައްޓެރި ގައުމު ކަމަށް ވާއިރު، އެ ގައުމަށް ކުރިމަތިވެފައިވާ ހިތާމަވެރި ހާލަތުގައި ދިވެހިންގެ ފަރާތުން ދެވެން އޮތް އެހީތެރިކަމެއް ދިނުމަކީ ކޮންމެހެން ކުރަންޖެހޭ ކަމެކެވެ. މި ޓެލެތޯންގައި ބައިވެރިވުމުގެ ފުރުސަތު ރާއްޖޭގެ ހުރިހާ މީޑިއާތަކަށާއި، ޖަމިއްޔާ ޖަމާއަތްތަކާއި ކްލަބްތަކާއި އޮފީސްތަކަށް ވަނީ ހުޅުވާލައިފަ އެވެ.
ތޫފާން “ދީތުވާ” ގެ ސަބަބުން ލަންކާގެ ހާލަތު ވަނީ ވަރަށް ބޮޑަށް ގޯސްވެފަ އެވެ. ފެން ބޮޑުވުމާއި ބިންގަނޑު ކަނޑައިގެން ދިއުން ފަދަ އެކި ހާދިސާތަކުގައި މަރުވި މީހުންގެ އަދަދު 132 އަށް އަރާފައިވާ އިރު، ހާލަތު އިތުރަށް ގޯސްވުމުގެ ސަބަބުން މިއަދު ވަނީ ކުއްލި ނުރައްކަލުގެ ހާލަތު ވެސް އިއުލާނުކޮށްފަ އެވެ. ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ބުނާ ގޮތުގައި، މޫސުން ގޯސްވުމުގެ ސަބަބުން މިހާތަނަށް 15،000 އަށް ވުރެ ގިނަ ގެދޮރު ހަލާކުވެ، 78،000 އަށް ވުރެ ގިނަ މީހުން ވަގުތީ ހިޔާތަކަށް ދާން މަޖުބޫރު ވެފައިވެ އެވެ.
ލަންކާ އަށް ލިބިފައިވާ ގެއްލުންތަކާ ގުޅިގެން އެހީތެރިކަން ފޯރުކޮށްދިނުމަށްޓަކައި ދިވެހި ސަރުކާރުން ވެސް ވަނީ އެހީތެރިކަން ފޯރުކޮށްދިނުމަށް ނިންމާފަ އެވެ. އެގޮތުން، 50،000 ޑޮލަރާއި 25،000 ކޭސް މަސްދަޅު ހަދިޔާ ކުރަން ސަރުކާރުން މިހާރު ވަނީ ނިންމައިފަ އެވެ. ޕީއެސްއެމުން ބާއްވާ މި ޓެލެތޯނަކީ، މި ހާލަތުގައި ލަންކާގެ ރައްޔިތުންނަށް އިތުރު އެހީތެރިކަމެއް ފޯރުކޮށްދިނުމަށް ދިވެހި ރައްޔިތުންނަށް ލިބޭ ފުރުސަތެކެވެ.
