ބ.އޭދަފުށްޓަށް ގިނަގުނަ ޚިދުމަތްތަކެއް ކޮށްދެއްވާފައިވާ ޤަދަރުވެރި ބޭފުޅެއް ކަމުގައިވާ، މި ރަށު ޑޭޒީވިލާ، މުޙައްމަދު ޢަލީ މިއަދު އަވަހާރަވުމުގެ ހިތާމައިގާ އެ ޢާއިލާއަށް ރައީސް ޑރ. މުހައްމަދު މުއިއްޒު އާއިލާއަށް ތައުޒިޔާ ވިދާޅުވެއްޖެ އެވެ.
ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، އޭދަފުށީގެ ތަރައްޤީއަށް، މި ރަށުގައި ވިޔަފާރިއާއި ދަތުރުފަތުރާއި މަސްވެރިކަން ކުރިއެރުވުމަށް، އިޖްތިމާޢީ ކަންކަމަށް، ވަކީން ޚާއްޞަކޮށް މިސްކިތް ބިނާކުރެއްވުމާއި އިސްލާމް ދީނަށް ޚިދުމަތް ކުރެއްވުމަށް މުޅި ރާއްޖެއަށް ނަމޫނާ މަސައްކަތްތަކެއް މަރްޙޫމް މުޙައްމަދު ޢަލީ ކޮށްދެއްވާފައިވާ ކަމަށެވެ.
މުހައްމަދު އަލީ އަވަހާރަވީ އިންޑިއާގެ ޗެންނާއީގައި ފަރުވާ ހޯއްދަވަމުން ގެންދަވަނިކޮށް މިއަދެވެ. އޭނާ އަވަހާރަވިއިރު އުމުރުފުޅަކީ 91 އަހަރެވެ. އުމުރުން ދުވަސްވެ، ބަލިވެ އުޅުއްވާތާ އެތައް ދުވަހެއް ވެފައިވާ މުހައްމަދު އަލީ ޗެންނާއީ އަށް ގެންދިޔައީ އިތުރަށް ހާލު ގޯސްވެގެން މީގެ ދުވަސްތަކެއް ކުރިންނެވެ.
މުހައްމަދު އަލީ އަކީ އޭދަފުށީގައި ވަރަށް ފުޅާކޮށް ކުރިން ވިޔަފާރި ކުރެއްވި އަދި މިރަށުގެ ގިނަ ބައެއްގެ ލޯބި ހޯއްދަވާފައިވާ އޭދަފުށީގެ ތަރައްގީގައި މުހިންމު ބައިވެރިއެކެވެ. އަމިއްލަ މަސްދޯނިފަހަރާއި މުދާ އުފުލާ ދޯނިފަހަރު ގެންގުޅުއްވި އެވެ. ބ. އަތޮޅުގައި ފަޅުރަށްރަށް ބެލެހެއްޓެވި އެވެ. ގޭގައި ފިހާރައެއް ހިންގަވައި އަދި ބަކަރި ގެންގުޅުއްވި އެވެ. މިހާރު މުހައްމަދު އަލީ ގެންގުޅުއްވާ ފެރީތައް ވަނީ ކޮންޓްރެކްޓް އުސޫލުން އެމްޓީސީސީ އަށް ދޫކޮށްފަ އެވެ.
މުހައްމަދު އަލީ އެންމެ ބޮޑަށް ބޭނުންވި ކަމަކީ އޭނާ މި ދުނިޔެ އިން ވަކިވުމުގެ ކުރިން އަމިއްލަ ރަށުގައި މިސްކިތެއް ބިނާކޮށްދެއްވުމެވެ. މީގެ ހަތަރު އަހަރު ކުރިން އެ މިސްކިތުގެ އަމަލީ މަސައްކަތްތައް މުހައްމަދު އަލީގެ ބޭފުޅުންގެ އެހީތެރިކަމާ އެކު ނިންމައި ހުޅުވީ މީގެ 8 މަސް ކުރިން މި އަހަރުގެ މާޗު މަހުގެ 20 ވަނަ ދުވަހު އެވެ.
އެ މިސްކިތް މިއަދު ވެފައިވަނީ އޭދަފުއްޓަށް އެތައް ބަޔަކު ޒިޔާރަތް ކުރަން ވެސް މެދުވެރިވާނެ އެއް ސަބަބަށެވެ. ރަށުގެ ތާރީހު ބަދަލުކޮށްލި ފަހުރުވެރި ބިނާއަކަށެވެ.
