ނަޝީދުގެ ވެރިކަމެއްގައި އޭދަފުށީ ބިންހިއްކައި ސްޓޭޑިއަމެއް ނުހެދޭނެ: ވާހިދު

 

އެމްޑީޕީގެ ވެރިކަމެއްގައި އޭދަފުށީ ބިންހިއްކައި އަދި އިންޓަނޭޝަނަލު ފެންވަރުގެ ފުޓްބޯޅަ ދަނޑެއް އަޅައިދޭނެ ކަމަށް ރައީސް ނަޝީދު ވައުދުވެ ވަޑައިގެންފައިވީ ނަމަވެސް އެމަނިކުފާނަށް އެކަންތައްތައް ނުކޮށްދެވޭނެ ކަމަށާއި، އެކަންވާނީ ހަމައެކަނި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނުގެ ވެރިކަމެއްގައިކަމަށް ބ. އޭދަފުށީ ކައުންސިލުގެ މެންބަރު އަބްދުލް ވާހިދު ވިދާޅުވެއްޖެ އެވެ.

ރޭ ޕީޕީއެމުން އޭދަފުށީގައި ބޭއްވި ކަންމަތީ ބައްދަލުވުމުގައި ވާހަކަ ދައްކަވަމުން ވާހިދު ވިދާޅުވީ އެމްޑީޕީން އޭދަފުށީގައި ބައިނަލް އަގްވާމީ ފެންވަރުގެ ފުޓްބޯޅަ ދަނޑެއް ނުވަތަ ސްޓޭޑިއަމެއް އަޅައިދޭނަމޭ ބުނަމުން ގެންދަނީ ކޮންކަހަލަ މާނައެއްގައިކަން ނުވިސްނޭތީ އެކަމާ ހައިރާންވެ ވަޑައިގަންނަވާ ކަމަށެވެ.

ވާހިދު ވިދާޅުވީ ފުރަތަމަ އިންޓްނޭޝަނަލް ފެންވަރުގެ ފުޓްބޯޅަ ސްޓޭޑިއަމެއްގެ އަގަކީ މިލިއަން އޮފް  ބިލިއަން ޑޮލާސް ގާތްގަޑަކަށް 45 ނުވަތަ 50 މިލިއަން ޑޮލަރު ކަމަށާއި ދިވެހި ދައުލަތުގެ އާމުދަނީގެ މުޅި ޖުމްލައަކީ 10 ނުވަތަ 12 ބިލިޔަން ދިވެހި ރުފިޔާ ކަމަށެވެ.

” ދެން ކިހިނެއްތޯ މި އޭދަފުށީގައި އިންޓަނޭޝަނަލް ފެންވަރުގެ ފުޓްބޯޅަ ސްޓޭޑިއަމެއް ތަރައްގީކޮށް އަޅާނީ. ނުކުރެވޭނެ އެކަމެއް” ފުޓްބޯޅައިގައި ފުރަތަމަ ފަހަރަށް ރާއްޖެއަށް ރިހިމެޑަލް ހޯދައިދިން ގައުމީ ޓީމުގައި ހިމެނުނު އޭދަފުއްޓަށް އުފަން ހަމައެކަނި ކުޅުންތެރިޔާ ވާހިދު ވިދާޅުވި އެވެ.

ވާހިދު ވިދާޅުވީ ރައީސް ނަޝީދަށް އޭދަފުށީގެ ބިންވެސް ނުހިއްކޭނެ ކަމަށާއި އެކަންވެސް ވާނީ ހަމައެކަނި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނަށާއި ރަނިންމޭޓް ޑރ ޖަމީލުގެ ވެރިކަމެއްގައި ކަމަށެވެ.

“ސަބަބަކީ 2011 ވަނަ އަހަރު މަޖިލީހުން ފާސްކުރިި ބަޖެޓް ގައި އޮންނާނެ އޭދަފުށީގައި 11 ހެކްޓަރުގެ ބިން ހިއްކުމަށް 23.4  މިލިޔަން ރުފިޔާ. ދެން ކީއްވެތޯ އެ އަހަރު ބަޖެޓްގައި ހިމެނިފައި އޮތްއިރު ނަޝީދުގެ ވެރިކަމުގައި މިރަށުގެ ބިން ނުހިއްކީ. އެހެންވީމަ އެ ވެސް ދައްކާ ނަނާ ހުވަފެނެއް. ނުވާނެ އެކަމެއް.” ވާހދު ވިދާޅުވި އެވެ.

ވާހިދު ވިދާޅުވީ އެމްޑީޕީން ދޮގާއި މަކަރާއި ހީލަތް ހަދައިގެން ވޯޓް ހޯދަން އުޅުމަކީ ކުޑަކުދިންގެ ސިކުނޑިތަކާ ކުޅެން އުޅުން ކަހަލަ ކަމެއް ކަމަށާއި އަދި އެކަމެއް ނުކުރެވޭނެ ކަމަށެވެ.

“އެ ދުވަސް މާޒީވެ ހިނގައްޖެ. އަޅުގަނޑު ރައީސް ނަޝީދަށް ދަންނަވާނީ “އެއްބުރުންނެއް ނޫނޭ ކަފަ ބުރުން” ވެސް ތިބޭފުޅާއަށް ރައީސްކަމަށް އިރާދަކުރެއްވިއްޔާ ނާދެވޭނެޔޭ” ވާހިދު ވިދާޅުވި އެވެ.