އޭދަފުށިން ގޯތިލިބޭ މީހުންގެ ވަގުތީ ލިސްޓު މާދަމާ އާންމުކުރަނީ

ބ. އޭދަފުށިން ގޯތިލިބޭ މީހުންގެ ވަގުތީ ލިސްޓު މާދަމާ އާންމުކުރަން އޭދަފުށީ ކައުންސިލުން ތައްޔާރުވެއްޖެ އެވެ.

“އީޓީ” އަށް އެނގިފައިވާ ގޮތުގައި އޭދަފުށިން ދޫކުރުމަށް ހަމަޖެހިފައިވާ ގޯތިތަކަށް އެދި ހުށައެޅި ފޯމްތައް ރީޗެކްކޮށް މިހާރުވަނި ނިންމައިފަ އެވެ.

ކައުންސިލުން ކުރިން ބުނިގޮތުގައި ގޯތިލިބޭ މީހުންގެ ވަގުތީ ލިސްޓް އާއްމު ކުރުމާއެކު ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާނެ އެވެ. އަދި ދާއިމީ ލިސްޓް އާންމު ކުރާނީ ވަގުތީ ލިސްޓަށް ހުށަހަޅާ ޝަކުވާތަކާ ގުޅިގެން ނުވަތަ ސާފު ކުރެވޭ އިތުރު މައުލޫމާތާއި ލިސްޓަށް ގެންނަން ޖެހޭ އުނިއިތުރެއްވާ ނަމަ، އެ އުނިއިތުރެއް ގެނައުމަށް ފަހު އެވެ.

އޭދަފުށީ ހިއްކި ބިމުން ފުރަތަމަ ބުރުގައި ދޫކުރަން ނިންމާފައިވަނީ 158 ގޯއްޗެވެ. ނަމަވެސް ގޯއްޗަށް އެދި ކުރިމަތިލުމަށް ހުޅުވާލި ފުރުސަތުގައި 662 މީހަކު ކުރިމަތިލިކަމަށް ކައުންސިލުން ބުނެފައިވެ އެވެ.

އޭދަފުށިން ގޯތި ދޫކުރަން ނިންމާފައިވާއިރު، އެންމެ ފަހުން މިރަށުން ގޯތި ދޫކުރީ މީގެ 31 އަހަރު ކުރިންނެވެ. ބިންފުރި ގޯތި ބޭނުންވާ އެތައް އާއިލާއެއް މިރަށުގައި ދިރިއުޅެމުންދާއިރު، 2014 ވަނަ އަހަރު ވަނީ ބިން ހިއްކައިގެން ރަށުގެ ބިމަށް 26 ހެކްޓަރު އިތުރުކޮށްފަ އެވެ.