ތުޅާދޫގައި ރައްޔިތުން އުއްމީދު ކުރާ ފަދަ އެއާޕޯޓެއް ގާއިމްކޮށްދޭނަން: ރައީސް
ރައީސް ޑރ. މުހައްމަދު މުއިއްޒަށް މަރުހަބާ ކިޔުމަށް ބ. ތުޅާދޫގައި ހަދާފައި ހުރި ގިޑިގެއިން ފެންނަނީ އެ ރަށުގެ މީހުންގެ އުއްމީދުތަކާ މިހާރު އެންމެ ބޮޑަށް ގުޅިފައިވާ މަޝްރޫއު އެވެ. އެއީ އެ ރަށުގެ އެއާޕޯޓެވެ.
ތުޅާދޫ އެއާޕޯޓް މަސައްކަތް ނިންމުމަކީ ރައީސް މުއިއްޒުގެ ރިޔާސީ ވައުދުފުޅެކެވެ.
ރައީސް މިއަދު އެރަށުގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވަނީ ވަރަށް ސާފު ޖަވާބެއް ދެއްވައިފަ އެވެ. ވިދާޅުވީ ތުޅާދޫގެ އެއާޕޯޓް މިހާތަނަށް ހަގީގަތަކަށްވެފައި ނެތް ނަމަވެސް، އެ މަޝްރޫއުއަށް އިތުރު ބަދަލުތައް ގެނެސް ރައްޔިތުން އުއްމީދު ކުރާ ފަދަ އެއާޕޯޓެއް ގާއިމްކޮށް ދެއްވާނެ ކަމަށެވެ.
ރައީސް ވިދާޅުވި ގޮތުގައި ތުޅާދޫ އެއާޕޯޓަކީ މި ވަގުތު ރައްޔިތުން އެންމެ އުއްމީދު ކުރަމުންދާ މަޝްރޫއު ނަމަވެސް، އެ މަޝްރޫއު ކުރިއަށް ދަނީ ވަރަށް ލަސްކޮށް، ފަނޑުކޮށް އަދި ހަގީގަތަކަށް ނުވާނެއޭ ހީވާ ގޮތަކަށް ކަމަށެވެ.
ނަމަވެސް، މި ސަރުކާރުން ތުޅާދޫ ރައްޔިތުންނަށްދޭ ޔަގީން ކަމަކީ ރައީސް ވިދާޅުވި ގޮތުގައި ތުޅާދޫ އެއާޕޯޓްގެ މަޝްރޫއުގެ ސްކޯޕް ބޮޑުކޮށް އިތުރު ކުރިއެރުންތައް ގެނެސް، ރައްޔިތުންގެ އުއްމީދުތައް ފުރިހަމަވާ ވަރުގެ އެއާޕޯޓެއް އެޅުމެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ފެށި ތުޅާދޫ އެއާޕޯޓް މަޝްރޫއަށް ބިން ހިއްކުމުގެ މަސައްކަތް ފެށީ ރިޔާސީ އިންތިހާބު ފެށެން ކުޑަ ދުވަސްކޮޅަކަށް ވެފައި އޮއްވައެވެ.
ރައީސް ވިދާޅުވީ ތުޅާދޫ އެއާޕޯޓް މަޝްރޫއު ޙަޤީޤަތަކަށް ހަދައިދިނުމާއެކުނ އެ ރަށުގައި އިތުރު 100 ހައުސިން ޔުނިޓް ތަރައްޤީކުރުމުގެ މަޝްރޫޢުއެއް މިއަހަރުތެރޭ ފަށާނެ ކަމަށެވެ.
މީގެ އިތުރުން ތުޅާދޫގައި ޒަމާނީ ފެންވަރުގެ ހޮސްޕިޓަލެއް ތަރައްގީ ކުރުމާއި ޒަމާނީ ފެންވަރަށް މަގުތައް ހެދުމާއި ސްޕޯޓްސް ކޮމްޕްލެކްސް އެޅުމުގެ މަސައްކަތް މި ސަރުކާރުން ކުރާނެ ކަމަށް ވެސް ރައީސް ވިދާޅުވި އެވެ
ކޮމެންޓްސް (0)
ލޯޑް ކުރަނީ...