އޭދަފުއްޓާއި ފެހެންދޫ ވާދަކުރާ މެޗު މިއަދު ހަވީރު

މިހާރު ކުރިއަށްދާ ގޯލްޑަން ފުޓްސަލް ޗެލެންޖް 2026 ގެ އަތޮޅު ބުރުގައި އޭދަފުއްޓާއި ފެހެންދޫ މިއަދު ވާދަކުރާނެ އެވެ.

ބ. އަތޮޅު ބުރުގައި މިއަހަރު ވާދަކުރަނީ ތިން ރަށަކުންނެވެ. އެއީ އޭދަފުއްޓާއި ފެހެންދޫގެ އިތުރުން ދަރަވަންދޫ އެވެ.

ފުރަތަމަ މެޗުގައި ދަރަވަންދޫ ވަނީ ފެހެންދޫގެ މައްޗަށް 1-2 އިން ކުރި ހޯދައިފަ އެވެ. ދެ ވަނަ މެޗުގައި އޭދަފުށިން ވަނީ ދަރަވަންދޫ 0-5 އިން ބަލިކޮށްފަ އެވެ.

މިއަދު ހަވީރު ކުޅޭ މެޗު އެއްވަރުވެއްޖެ ނަމަ އަތޮޅު ފައިނަލަށް ދާނީ އޭދަފުއްޓާއި ދަރަވަންދޫ އެވެ. ފެހެންދޫ އަށް ފައިނަލްގެ ފުރުސަތު އޮތް ހަމައެކަނި ގޮތަކީ ބޮޑު ތަފާތަކުން އޭދަފުށި ބަލިކުރުމެވެ. އެނޫން ކޮންމެ ހާލަތެއްގައި މިމަހުގެ 22 ވަނަ ދުވަހުގެ ރޭ ކުޅޭ ފައިނަލުގައި ވާދަކުރާނީ އޭދަފުއްޓާއި ދަރަވަންދޫ އެވެ.

އޭދަފުށިން އެޓީމު މުބާރާތުގައި ވާދަކުރި 6 އަހަރު ވެސް ޗެމްޕިއަންކަން ހޯދައިފަ އެވެ. އޭދަފުށި ވާދަކުރަން ފެށިފަހުން އިތުރު ރަށަކަށް އަތޮޅު ޗެމްޕިއަންކަން ލިބިފައެއްނުވެ އެވެ. އޭގެކުރިން ތުޅާދޫ އާއި ހިތާދޫ އިން އަތޮޅު ބުރުގެ ޗެމްޕިއަންކަން ހޯދި އެވެ. އަދި ހިތާދޫ އިން ގޯލްޑަން ފުޓްސަލްގެ ފުރަތަމަ މުބާރާތް 2015 ވަނަ އަހަރު ކާމިޔާބުކުރި އެވެ.

އޭދަފުއްޓާއި ފެހެންދޫ ވަނީ މީގެ ކުރިން ވެސް އަތޮޅު ބުރުގައި ވާދަކޮށްފަ އެވެ. އަދި، 2023 ވަނަ އަހަރުގެ އަތޮޅު ފައިނަލުގައި ފެހެންދޫ ވަނީ އޭދަފުއްޓާ ވާދަކޮށް ބަލިވެފަ އެވެ.

އޭދަފުއްޓާއި ފެހެންދޫ ވާދަކުރާ މެޗު ހުޅުމާލެ ރެހެންދި ޓާފް ފުޓްސަލް ދަނޑުގައި ފަށާނީ މިއަދު ހަވީރު 5 ޖަހާއިރު އެވެ. އަތޮޅު ފައިނަލް މެޗު ޖަނަވަރީ 22 ވަނަ ދުވަހުގެ ރޭ ފަށާނީ 21:45 ގަ އެވެ.