ކޮންމެ އަތޮޅެއްގައި ދަތުރުދާނެ ރަށެއް ތަރައްގީކުރުމަށް ކޮންސަލްޓަންސީ ދޭނެ ބަޔަކު ހޯދަނީ

ރާއްޖޭގެ ކޮންމެ އަތޮޅެއްގައި ދަތުރުދާނެ ހާއްސަ ރަށެއް ތަރައްގީކުރުމަށް ސަރުކާރުން ކުރިއަށްގެންދާ މަޝްރޫއަށް ކޮންސަލްޓަންސީ ދޭނެ ފަރާތެއް ހޯދުމަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން އިއުލާންކޮށްފިއެވެ.

މިއީ ރައްޔިތުންނާއި ފަތުރުވެރިންނަށް ދަތުރުދާނެ ރަށްތަކެއް ކަނޑައެޅުމަށް ރައީސުލްޖުމްހޫރިއްޔާ ވެވަޑައިގެންފައިވާ ވައުދުފުޅުގެ ދަށުން ކުރިއަށްގެންދާ މަސައްކަތެކެވެ.

ސޯޝަލް މިނިސްޓްރީން ކުރި އިއުލާނުގައި ބުނެފައިވަނީ “ޕިކްނިކް އައިލެންޑް ޑިވެލޮޕްމަންޓް ޕްރޮޖެކްޓް” ގެ ދަށުން ކޮންސަލްޓަންސީ މަސައްކަތް ކޮށްދޭނެ ފަރާތްތަކުން ބީލަމުގައި ރަޖިސްޓްރީވުމުގެ ފުރުސަތު މި މަހުގެ 21 ވަނަ ދުވަހުގެ މެންދުރުފަހު 2:00 އާ ހަމައަށް ހުޅުވާލާފައިވާ ކަމަށެވެ. އަދި އަންދާސީ ހިސާބު ހުށަހެޅުން އޮންނާނީ މި މަހުގެ 28 ވަނަ ދުވަހުގެ ހެނދުނު 10:00 ގައެވެ.

ކޮންމެ އަތޮޅެއްގައި ދަތުރުދާނެ ރަށެއް ތަރައްގީކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު އިއުލާންކުރެއްވީ މިދިޔަ އަހަރުގެ އޯގަސްޓް މަހު އއ. މަތިވެރީގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. ރައީސް ވިދާޅުވެފައިވަނީ އާއިލާތަކާއެކު ދަތުރުދާނެ ރަށެއް ނެތުމަކީ ރައްޔިތުންނަށް ކުރިމަތިވެފައިވާ ބޮޑު ތަކުލީފެއް ކަމަށެވެ.

މި މަޝްރޫއުގެ ދަށުން ކަނޑައަޅާ ރަށްތަކަކީ ހަމައެކަނި ރައްޔިތުންނަށް ހާއްސަ ރަށްތަކެއް ނޫން ކަމަށާއި، އެ ރަށްތަކުގެ ސަބަބުން ލޯކަލް ޓޫރިޒަމަށް ވެސް ބޮޑު ފައިދާއެއް ކުރާނެ ކަމަށް ސަރުކާރުން ގަބޫލުކުރެއެވެ. އެގޮތުން ގެސްޓްހައުސްތަކަށް އަންނަ ފަތުރުވެރިންނަށް ވެސް އެ ރަށްތަކަށް ދަތުރުދިއުމުގެ ފުރުސަތު އޮންނާނެއެވެ.

ރައީސް މުއިއްޒު ވިދާޅުވީ، “ރަށްރަށުގެ ރައްޔިތުންނަށް ވަރަށް އުނދަގޫ، ފުރުސަތު ނެތް އާއިލާއާ އެކު ޕިކްނިކް ދާނެ ތަނެއް. ގެސްޓުން ގެންދާނެ ތަނެއް ވެސް ނެތް. އެހެންވެ ކޮންމެ އަތޮޅަކަށް އެއް ރަށް ސަރުކާރުން ތަރައްގީކޮށްދީ، އެކަމުގެ ދިރާސާތައް އެބަކުރެވޭ” ކަމަށެވެ.

ސަރުކާރުގެ އަމާޒަކީ މި އަހަރުގެ ނިޔަލަށް ހުރިހާ އަތޮޅެއްގައި ދަތުރުދާނެ ރަށްތައް ކަނޑައަޅައި، އެ ރަށްތައް ތަރައްގީކުރުމުގެ މަސައްކަތް ނިންމުމެވެ. މި މަޝްރޫއަކީ އިޖުތިމާއީ ގުޅުން ބަދަހިކުރުމަށާއި ފަތުރުވެރިކަމުގެ ދާއިރާ ފުޅާކުރުމަށް ސަރުކާރުން ދޭ އިސްކަމުގެ ތެރެއިން ހިންގާ މުހިންމު މަޝްރޫއެކެވެ.