ޒޯން ފުރަތަމަ މެޗުގައި އޭދަފުށިން މާފުށި ބަލިކޮށްފި

މިހާރު ކުރިއަށްދަ ގޯލްޑަން ފުޓްސަލް ޗެލެންޖުގައި ރޭ ކުޅުނު މެޗުގައި އޭދަފުށިން 0-1 އިން މާފުށި ބަލިކޮށްފި އެވެ.

ރޭގެ މެޗަކީ ޒޯން ތިނެއްގައި އޭދަފުށި ކުޅުނު ފުރަތަމަ މެޗެވެ. ޒޯން ތިނެއްގައި ދެން ހިމެނެނީ ކ. ގާފަރާއި ޅ. ކުރެންދޫ އެވެ.

ރޭ ގާފަރާއި ކުރެންދޫ ވާދަކުރި މެޗު ނިމުނީ 1-1 އިން އެއްވަރުވެގެންނެވެ.

މާފުށީގެ މައްޗަށް އޭދަފުށިން ކުރި ހޯދީ ދެ ވަނަ ހާފުގައި މުހައްމަދު ފާސިރު (ފާއްޓެ) ޖެހި ގޯލުންނެވެ. އޭރިޔާ ބޭރުން ލިބުނު ބޯޅަ ފާއްޓެ ގޯލަށް ފޮނުވާލީ ތިރިތިރިންނެވެ.

މެޗުގައި އޭދަފުށީގެ ހަމަލާތައް ހުއްޓުވުމުގައި މާފުށީގެ ގޯލްކީޕަރު ތަފާތު މޮޅު ކުޅުމެއް ދެއްކި އެވެ. އަދި، މާފުށީގެ ހަމަލާތައް ހުއްޓުވުމުގައި އޭދަފުށީގެ ކީޕަރު އަބްދުﷲ ނާސިހު ވެސް މުހިއްމު ދައުރެއް އަދާކުރި އެވެ.

މެޗުގެ މޮޅު ކުޅުންތެރިޔާގެ މަގާމް ހޯދީ ގޯލު ޖެހި ފާއްޓެ އެވެ.

ޒޯން ބުރުގައި އޭދަފުށީ ކުޅޭ ދެ ވަނަ މެޗުގައި އަންނަ ބުދަ ދުވަހުގެ ރޭ ނުކުންނާނީ ކުރެންދޫއާ ދެކޮޅަށެވެ. އެކަމަކު އެ މެޗު އެދުވަހު އެގަޑީގައި ކުޅޭނެކަން އަދި ކަށަވަރެއް ނުވެ އެވެ.

ޒޯން ބުރުގެ ފައިނަލަށް ދަތުރުކުރާ ދެ ޓީމަށް މުބާރާތުގެ ނޮކައުޓް ބުރުން ފުރުސަތު ލިބޭނެ އެވެ. މިދިޔަ އަހަރުގެ އަތޮޅު ޗެމްޕިއަންކަމާއި ޒޯން ޗެމްޕިއަންކަން ހޯދީ އޭދަފުށިންނެވެ.