ސައްޓުއާ އެކު އޭދަފުއްޓަށް އާ ހިތްވަރެއް، މިރޭ ކުރެންދޫއާ ދެކޮޅަށް

ގޯލްޑަން ފުޓްސަލް ޗެލެންޖުގެ ޒޯން ތިނެއްގައި އޭދަފުށި ފުޓްސަލް ޓީމު މިރޭ ޅ. ކުރެންދޫއާ ދެކޮޅަށް ނުކުންނާނެ އެވެ.

މެޗަށް ނުކުންނައިރު އޭދަފުއްޓަށް ލިބިފައިވާ އެންމެ ބޮޑު ހިތްހަމަޖެހުމަކީ ސާފް ފުޓްސަލް ޗެމްޕިއަންޝިޕް ކާމިޔާބުކުރި ޓީމުގައި ހިމެނުނު އިޝާން އިބްރާހީމް (ސައްޓު) ޓީމާ ގުޅިފައިވުމެވެ.

ފުޓްސަލް ޓީމު ރޭ ރާއްޖެ އައިސްފައިވާއިރު ގޯލްޑަން ފުޓްސަލްގައި ހިމެނޭ ކުޅުންތެރިން މިރެއިން ފެށިގެން އެ ކުޅުންތެރިއަކު ނިސްބަތްވާ ޓީމުން ފެންނާނެ އެވެ. އޭގެތެރެއިން އެއް ކުޅުންތެރިއަކީ އޭދަފުށީގެ ސައްޓު އެވެ.

ސައްޓު އޭދަފުށީ ޓީމާ ގުޅުމަކީ ޓީމަށް ލިބިގެންދާ އިތުރު ހިތްވަރެކެވެ. މިދިޔަ އަހަރުތަކުގައި އޭދަފުށިން ހޯދި ކާމިޔާބީތަކުގައި ޓީމުގައި އެންމެ މުހިއްމު ދައުރެއް އަދާކުރި އެއް ކުޅުންތެރިއަކީ ސައްޓު އެވެ.

ގައުމީ ފުޓްސަލް ޓީމުން ޗެމްޕިއަންކަން ހޯދިއިރު ސައްޓު ވަނީ ޓީމުގައި މޮޅު ކުޅުމެއް ދައްކައިފަ އެވެ. އަދި، ބަންގްލަދޭޝްއާ ދެކޮޅަށް ކުޅުނު މެޗުގައި ގޯލު ޖަހައި އެ މެޗުގެ މޮޅު ކުޅުންތެރިޔާގެ މަގާމް ހޯދި އެވެ.

އޭދަފުށިން ވަނީ ޒޯން ބުރުގެ ފުރަތަމަ މެޗުގައި ކ. މާފުށި އަތުން 0-1 އިން މޮޅުވެފަ އެވެ. އެ މެޗުގައި އޭދަފުށީގެ ހަމައެކަނި ގޯލު ކާމިޔާބުކޮށްދިނީ މުހައްމަދު ފާސިރު (ފާއްޓެ) އެވެ. ފާއްޓެ ވަނީ އެ މެޗުގެ މޮޅު ކުޅުންތެރިޔާގެ މަގާމް ވެސް ހޯދައިފަ އެވެ.

ޒޯން ގްރޫޕުގައި ހިމެނޭ ގާފަރާއި ކުރެންދޫ ވާދަކުރި މެޗު ނިމުނީ 1-1 އިން އެއްވަރުވެގެންނެވެ. މިރޭ ޅ. އަތޮޅުގެ ޗެމްޕިއަން ކުރެންދޫ ބަލިކޮށްފި ނަމަ އޭދަފުއްޓަށް ޒޯން ފައިނަލުގެ ފުރުސަތާ އެކު ގަދަ 16 ގެ ޖާގައެއް ކަށަވަރުވާނެ އެވެ.

މިއަހަރުގެ މުބާރާތުގެ އަތޮޅު ޗެމްޕިއަންކަން އޭދަފުށިން ހޯދީ ފައިނަލުގައި ދަރަވަންދޫ 0-2 އިން ބަލިކޮށްގެންނެވެ. މިއީ އޭދަފުށިން އަތޮޅު ޗެމްޕިއަންކަން ހޯދި 7 ވަނަ ފަހަރެވެ.

އޭދަފުއްޓާއި ކުރެންދޫ ވާދަކުރާ މެޗު ފަށާނީ މިރޭ 9 ޖަހާއިރު އެވެ. މެޗު ކުޅޭނީ ހުޅުމާލެ ރެހެންދި ޓާފް ފުޓްސަލް ގްރައުންޑް 2 ގަ އެވެ. ޒޯން ތިނެއްގެ އަނެއް މެޗުގައި މާފުއްޓާއި ގާފަރު ވާދަކުރާ މެޗު ވެސް އެގަޑީގައި ކުޅޭނެ އެވެ.