ކުރެންދޫ ބަލިކޮށް އޭދަފުއްޓަށް ޒޯން ފައިނަލާއެކު ގަދަ 16 ގެ ޖާގައެއް

ގޯލްޑަން ފުޓްސަލް ޗެލެންޖުގައި ރޭ ޅ. ކުރެންދޫ 0-1 އިން ބަލިކޮށް އޭދަފުށިން ޒޯން ތިނެއްގެ ފައިނަލުގެ ޖާގައަކާ އެކު މުބާރާތުގެ ގަދަ 16 ގެ ޖާގައެއް ކަށަވަރުކޮށްފި އެވެ.

ރޭ ހުޅުމާލެ ރެހެންދި ފުޓްސަލް ޓާފް ގްރައުންޑް 2 ގައި ކުޅުނު މެޗުން ހޯދި މޮޅާ އެކު ޒޯން ތިނެއްގައި އޭދަފުށި އޮތީ 6 ޕޮއިންޓާ އެކު އެއް ވަނައިގަ އެވެ. ރޭ ގާފަރުން ވަނީ 0-3 އިން މާފުށި ބަލިކޮށް ފައިނަލުގެ އުއްމީދު ހޯދައިފަ އެވެ.

ގާފަރު 4 ޕޮއިންޓާ އެކު ދެ ވަނައިގައި އޮތްއިރު ކުރެންދޫ އޮތީ 1 ޕޮއިންޓާ އެކު ތިން ވަނައިގަ އެވެ. ޒޯން ތިނެއްގެ ދެ މެޗުން ވެސް ބަލިވެ މާފުށި ވަނީ މުބާރާތުން ކަޓައިފަ އެވެ.

އޭދަފުށިން ވަނީ ޒޯންގެ ފުރަތަމަ މެޗުގައި މާފުށި އަތުން ވެސް 0-1 އިން މޮޅުވެފަ އެވެ.

ރޭގެ މެޗުގައި އޭދަފުށީގެ ކެޕްޓަނަކީ ސާފް ފުޓްސަލް ޗެމްޕިއަންޝިޕްގައި ރާއްޖެއަށް ރަން މެޑަލް ހޯދައިދިން ޓީމުގެ މުހިއްމު ކުޅުންތެރިޔާ އިޝާން އިބްރާހީމް (ސައްޓު) އެވެ. މެޗު ފެށުމުގެ ކުރިން ގޯލްޑަން ފުޓްސަލް އެސޯސިއޭޝަނުން ވަނީ ރަން މެޑަލްގެ ކާމިޔާބީ ހޯދުމުން ސައްޓު އަށް ހަނދާނީ ފިލައެއް އަރުވައިފަ އެވެ.

މެޗު ޝަރަފްވެރިކޮށްދެއްވީ ގައުމީ ފުޓްސަލް ޓީމުގެ ކޯޗު އުޒްބެކިސްތާނުގެ ފާރޫކް ޒަކީރޯޒް އެވެ. އަދި، ގައުމީ ފުޓްސަލް ޓީމުގެ ގޯލްޑް ކެޕްޓަން މުހައްމަދު އިމްރާން (އިންމި) ވެސް މެޗު ބެލުމަށް ދަނޑަށް ހާޒިރުވި އެވެ.

ރޭގެ މެޗުގައި އޭދަފުށީގެ ހަމައެކަނި ގޯލު ދެ ވަނަ ހާފުގައި ލިބުނު ޕެނަލްޓީއަކުން ކާމިޔާބުކޮށްދިނީ އަލީ ނަސީމް (ދިއްލި) އެވެ. މިއީ ކުރެންދޫގެ ކުޅުންތެރިއަކު އޭރިޔާ ތެރެއިން ސައްޓު އަށް ފައުލް ކުރުމުން ވީޑިއޯ ސަޕޯޓްގެ އެހީގައި ރެފްރީ ދިން ޕެނަލްޓީއެކެވެ.

މެޗުގައި ކުރެންދޫ އިން ވަނީ އޭދަފުއްޓާ ދެކޮޅަށް ރަނގަޅު ކުޅުމެއް ދައްކައިފަ އެވެ. އަދި، އޭދަފުށީގެ ހަމަލާތައް ހުއްޓުވުމުގައި އެޓީމުގެ ގޯލްކީޕަރު ވެސް މުހިއްމު ދައުރެއް އަދާކުރި އެވެ.

އޭދަފުށިން އަންނަނީ މުބާރާތުގައި ބައިވެރިވާން ފެށީއްސުރެ ނޮކައުޓް ބުރަށް ކޮލިފައިވަމުންނެވެ. އަދި، އެ މުއްދަތުގައި އަތޮޅު ޗެމްޕިއަންކަން ހުރިހާ އަހަރަކު ވެސް އޭދަފުށިން ވަނީ ހޯދައިފަ އެވެ.

ޒޯން ބުރުގައި އޭދަފުށީގެ ފަހު މެޗުގައި ނުކުންނާނީ ކ. އަތޮޅު ޗެމްޕިއަން ގާފަރާ ދެކޮޅަށެވެ. އެ މެޗު ކުޅޭނީ އަންނަ ހުކުރު ދުވަހުގެ ރޭ 10 ޖަހާއިރު އެވެ. ހަމަ އެގަޑީގައި ކުރެންދޫ އާއި މާފުށި ވާދަކުރާ މެޗު ވެސް ކުޅޭނެ އެވެ.
ޒޯން ފައިނަލް އޮންނާނީ ފެބްރުވަރީ 2 ވަނަ ދުވަހުގެ ރޭ 8 ޖަހާއިރު އެވެ. ފައިނަލުގައި އޭދަފުއްޓާ ދެކޮޅަށް ނުކުންނަ ޓީމެއް ކަށަވަރުވާނީ ޒޯންގެ ފަހު މެޗުތަކަށް ފަހު އެވެ.