އޭދަފުށީގައި ހިނގި އެކްސިޑެންޓުގައި އަނިޔާވި އުމުރުން ދުވަސްވީ މީހާ ނިޔާވެއްޖެ

ބ. އޭދަފުށީގައި މިމަހުގެ 15 ވަނަ ދުވަހުގެ ރޭ ހިނގި ނުރައްކާތެރި އެކްސިޑެންޓެއްގައި އަނިޔާވި އުމުރުން ދުވަސްވީ މީހަކު، އައިޖީއެމްއެޗްގެ އައިސީޔޫގައި ފަރުވާ ދެމުން ދަނިކޮށް މިއަދު ހެނދުނު ނިޔާވެއްޖެއެވެ.

މި ހާދިސާގައި ނިޔާވެފައިވަނީ އޭދަފުށީ ސީސަންގެ، އުމުރުން 82 އަހަރުގެ އަބޫބަކުރު އަބްދުﷲ އެވެ.

މި އެކްސިޑެންޓް ހިނގާފައިވަނީ މިމަހުގެ 15 ވަނަ ދުވަހު އަބޫބަކުރު މަޣްރިބު ނަމާދު ނިންމުމަށްފަހު އަސާގަނޑެއްގެ އެހީގައި ހިނގާފައި ގެއަށް ދަނިކޮށް، މަގުމަތިން ދުއްވާފައި ދިޔަ ޕިކަޕަކުން ޖެހިގެންނެވެ.

މައުލޫމާތު ލިބިފައިވާ ގޮތުގައި މި އެކްސިޑެންޓް ހިނގަން މެދުވެރިވީ ޕިކަޕު ދުއްވަން އިން މީހާ ބަލަންޖެހޭ ވަރަށް ނުބަލާ ދުއްވުމުގެ ސަބަބުންނެވެ.

އެވަގުތު ޕިކަޕު ދުއްވަން އިނީ އޭދަފުށީ ދުނި، އަބްދުﷲ ރަމީޒެވެ. އޭނާއަކީ ގަވާއިދާ ހިލާފަށް ޕިކަޕު ދުއްވައިގެން މީގެ ކުރިން ވެސް ލައިސަންސް ހިފަހައްޓާފައިވާ މީހެއްކަން ވަނީ އެނގިފައެވެ.

ޕިކަޕުން ޖެހުމާއެކު އަބޫބަކުރު ބިންމައްޗަށް ވެއްޓި، ޕިކަޕުގެ ދަށުވިއެވެ. އެ ސަރަހައްދުގައި ތިބި އާންމުން އޭނާ ސަލާމަތް ކުރީ ޕިކަޕު ފަހަތަށް ކޮށްޕައިގެންނެވެ.

މަންޒަރު ދުށް މީހުން ބުނި ގޮތުގައި އަބޫބަކުރު ސަލާމަތްކުރި އިރު އޭނާގެ އެއްފައި އޮތީ ވަރަށް ބޮޑަށް ފަޅައިގެންގޮސް، މުޅި ސަރަހައްދަށް ލޭ ފައިބާފައެވެ. އެކްސިޑެންޓަށްފަހު ވަގުތުން ބ. އަތޮޅު ހޮސްޕިޓަލުގައި ފަރުވާ ދިނުމަށްފަހު، ހާލު ސީރިއަސްވުމުގެ ސަބަބުން ޖެހިގެން އައި ދުވަހު ވަނީ އެމެޖެންސީގައި މާލެ ގެނެސް އައިޖީއެމްއެޗްގައި ފަރުވާ ދޭން ފަށާފައެވެ.

މި މައްސަލައާ ގުޅިގެން ޕިކަޕު ދުއްވަން އިން މީހާ މިހާރު ހުރީ ފުލުހުންގެ ބެލުމުގެ ދަށުގައެވެ. ފުލުހުން ގެންދަނީ މި ހާދިސާ އިތުރަށް ތަހުގީގު ކުރަމުންނެވެ.