ސައްޓުއަށް އޭދަފުށިން ހޫނު މަރުހަބާއެއް

ދެކުނު އޭޝިއާގެ ފުޓްސަލް ޗެމްޕިއަންކަން ފުރަތަމަ ފަހަރަށް ރާއްޖެއަށް ހޯދައިދިނުމުގައި މުހިންމު ދައުރެއް އަދާކުރި ގައުމީ ފުޓްސަލް ޓީމުގެ ހުނަރުވެރި ކުޅުންތެރިޔާ އިޝާން އިބްރާހީމް (ސައްޓު) އަށް އޭނާގެ އުފަން ރަށް، ބ. އޭދަފުށިން އިއްޔެ ވަރަށް ހޫނު މަރުހަބާއެއް ކިޔައިފިއެވެ.

ސައްޓު އިއްޔެ މެންދުރުފަހު އޭދަފުއްޓަށް ދިއުމުން އޭނާއަށް މަރުހަބާ ކިޔުމަށްޓަކައި ބަނދަރު ސަރަހައްދަށް ގިނަ އަދަދެއްގެ ބަޔަކު ވަނީ އެއްވެފައެވެ. މީގެ ތެރޭގައި ސައްޓުގެ އާއިލާގެ މެންބަރުންނާއި، ރަށުގެ އާންމު ރައްޔިތުންގެ އިތުރުން ސަރުކާރުގެ އެކި އޮފީސްތަކާއި މުއައްސަސާތަކުގެ މުވައްޒަފުން ބައިވެރިވެފައިވެއެވެ.

ނިމިދިޔަ ސާފް ފުޓްސަލް ޗެމްޕިއަންޝިޕްގައި ރާއްޖެއިން ކުޅުނު ހުރިހާ މެޗެއްގެ ފުރަތަމަ ފަސް ކުޅުންތެރިންގެ ތެރޭގައި ސައްޓު ވަނީ ހިމެނިފައެވެ. މި މުބާރާތުގައި އޭނާ ދެއްކި މޮޅު ކުޅުމުގެ ތެރެއިން، ބަންގްލަދޭޝްއާ ދެކޮޅަށް ކުޅުނު މެޗުގައި ލަނޑު ޖަހައި، އެ މެޗުގެ އެންމެ މޮޅު ކުޅުންތެރިޔާގެ މަގާމުވެސް އޭނާ ވަނީ ހޯދާފައެވެ.

މިއީ ސައްޓު ގައުމީ ފުޓްސަލް ޓީމުގެ ޖާޒީގައި ބައިނަލްއަގުވާމީ މައިދާނުގައި ވާދަކުރި ހަތަރުވަނަ ފަހަރެވެ. މީގެ ކުރިންވެސް އޭނާ ވަނީ ތިން މުބާރާތެއްގައި ގައުމީ ޓީމު ތަމްސީލުކޮށްފައެވެ.

ފުޓްސަލްގެ ތާރީހުގައި ރާއްޖެއިން ހޯދި މި ބޮޑު ކާމިޔާބީގައި އޭދަފުށީގެ ކުޅުންތެރިއެއްގެ ހިއްސާ މިހާ ބޮޑަށް އޮތުމަކީ، ފުޓްބޯޅައިގެ ރަށެއްގެ ގޮތުގައި މަޝްހޫރު އޭދަފުށީގެ ނަން ކުޅިވަރުގެ ތާރީހުގައި އަނެއްކާވެސް ރަން އަކުރުން ލިޔެވިގެންދާނެ ކަމެއްގެ ގޮތުގައި ރަށުގެ ރައްޔިތުން ފާހަގަކުރެއެވެ.