ޒޯން ތިނެއްގެ ފަހު މެޗުގައި އޭދަފުއްޓާއި ގާފަރު މިރޭ

މިހާރު ކުރިއަށްދާ ގޯލްޑަން ފުޓްސަލް ޗެލެންޖުގެ ޒޯން ތިނެއްގެ ފަހު މެޗުގައި އޭދަފުއްޓާއި ކ. ގާފަރު މިރޭ ވާދަކުރާނެ އެވެ.

ޒޯން ތިނެއްގައި މިހާތަނަށް ކޮންމެ ޓީމަކުން ދެ މެޗު ވަނީ ކުޅެފަ އެވެ. އޭދަފުއްޓާއި ގާފަރުގެ އިތުރުން ޒޯން ތިނެއްގައި ހިމެނެނީ ޅ. އަތޮޅުގެ ޗެމްޕިއަން ކުރެންދޫ އާއި ކ. އަތޮޅުގެ ރަނަރަޕް މާފުއްޓެވެ.

މިރޭގެ މެޗަށް ނުކުންނައިރު އޭދަފުށި ވަނީ ދެ މެޗުން ވެސް މޮޅުވެ ޒޯން ފައިނަލުގެ ޖާގައިގެ އިތުރުން ގަދަ 16 އިން ވެސް ފުރުސަތު ހޯދައިފަ އެވެ.

އޭދަފުށި ވަނީ ފުރަތަމަ މެޗުގައި 0-1 އިން މާފުށި ބަލިކޮށްފަ އެވެ. ދެ ވަނަ މެޗުގައި ކުރެންދޫ އަތުން ވެސް އޭދަފުށި މޮޅުވީ ހަމަ އެ ނަތީޖާއިންނެވެ.

ގްރޫޕުގެ އެއް ވަނައިގައި އޭދަފުށި އޮތްއިރު ދެ ވަނައިގައި އޮތީ 4 ޕޮއިންޓް ލިބިފައިވާ ގާފަރެވެ. ތިން ވަނައިގައި އޮތް ކުރެންދޫ އަށް 1 ޕޮއިންޓް ލިބިފައިވާއިރު ފުލުގައި ޕޮއިންޓެއް ނުލިބި އޮތް މާފުށި ވަނީ ކަޓައިފަ އެވެ.

މިރޭގެ މެޗު އެއްވަރުވެއްޖެ ނަމަ ގާފަރަށް ޒޯން ފައިނަލުގެ ދެ ވަނަ ޖާގަ ލިބޭނެ އެވެ. ގާފަރަށް ފުރުސަތު ގެއްލޭނީ އެޓީމު އޭދަފުށި އަތުން ބަލިވެ، ކުރެންދޫ އިން ބޮޑު ތަފާތަކުން މާފުށި ބަލިކޮށްގެންނެވެ.

ޒޯން ތިނެއްގެ ފައިނަލް މެޗު ކުޅޭނީ އަންނަ ހޯމަ ދުވަހުގެ ރޭ 8 ޖަހާއިރު އެވެ. މިދިޔަ އަހަރުގެ ޒޯން ފައިނަލުގައި ޕެނަލްޓީ ޖަހައިގެން ކާށިދޫ ބަލިކޮށް ޗެމްޕިއަންކަން ހޯދީ އޭދަފުއްޓެވެ.

އޭދަފުއްޓާއި ގާފަރު ވާދަކުރާ މެޗު ހުޅުމާލެ ރެހެންދި ޓާފް ފުޓްސަލް ދަނޑުގައި ފަށާނީ މިރޭ 10 ޖަހާއިރު އެވެ.