ޒޯން ތިނެއްގެ އެއް ވަނަ އޭދަފުއްޓަށް، ފައިނަލުގައި ގާފަރާ ދެކޮޅަށް މާދަމާ ރޭ

މިހާރު ކުރިއަށްދާ ގޯލްޑަން ފުޓްސަލް ޗެލެންޖުގެ ޒޯން ތިނެއްގެ މެޗުތައް ރޭ ކުޅެ ނިމުނުއިރު، އެއް ވަނަ އޭދަފުށިން ހޯދައިފި އެވެ.

އޭދަފުށިން ޒޯން ތިނެއްގެ ގްރޫޕުގެ އެއް ވަނަ ލިބުނީ ރޭ ގާފަރާ ވާދަކުރި މެޗު 1-1 އިން އެއްވަރުވުމުންނެވެ.

ރޭ ހުޅުމާލެ ރެހެންދި ޓާފް ފުޓްސަލް ދަނޑުގައި ކުޅުނު މެޗު އެއްވަރުވިއިރު އޭދަފުށީގެ ހަމައެކަނި ގޯލު ކާމިޔާބުކޮށްދިނީ ދެ ވަނަ ހާފުގައި، ހުސައިން ޝަރީފް (ކާޑޭ) އެވެ. ޝަރީފްއަށް ލިބުނު ބޯޅަ ވައްދާލީ ގޯލުގެ މަތީ ކަނަށެވެ.

ގާފަރުން މެޗުގެ ނަތީޖާ ހަމަހަމަކުރީ ނިމެން ކައިރިވެފައި ވަނިކޮށެވެ. ގޯލުގެ ދަނޑީގައި ޖެހިފައި ވެއްޓުނު ބޯޅަ ގޯލަށް ވައްދާލީ މެޗުގެ މޮޅު ކުޅުންތެރިޔާގެ މަގާމް ވެސް ހޯދި ގާފަރު ޓީމުގެ ކެޕްޓަން ސާމިން މުހައްމަދު ނަސީރު އެވެ.

މެޗުގައި އޭދަފުށީ އިޝާން އިބްރާހީމް (ސައްޓު) އާއި މުހައްމަދު ފާސިރު (ފާއްޓެ) ކުޅެފައެއްނުވެ އެވެ. މުހިއްމު ކުޅުންތެރިން ނުލައި ވެސް އޭދަފުށީގެ ކުޅުންތެރިން މޮޅު ކުޅުމެއް ދެއްކި އެވެ.

ގްރޫޕުގެ އަނެއް މެޗުގައި ރޭ ކުރެންދޫ ވަނީ 1-2 އިން މާފުށި ބަލިކޮށްފަ އެވެ. އެކަމަކު އެޓީމަށް ކުރިއަށް ނުދެވުނެވެ.

ގްރޫޕުގެ އެއް ވަނަ އޭދަފުއްޓަށް ލިބުނީ 7 ޕޮއިންޓާ އެކު އެވެ. ދެ ވަނަ ލިބުނީ، 5 ޕޮއިންޓް ހޯދި ގާފަރަށެވެ. ކުރެންދޫ އަށް 4 ޕޮއިންޓް ލިބުނުއިރު ފުލަށް ދިޔައީ ޒޯންގެ ތިން މެޗުން ވެސް ބަލިވި މާފުއްޓެވެ.

އޭދަފުއްޓާއި ގާފަރު ޒޯން ފައިނަލުގައި ވާދަކުރާ މާދަމާ ރޭ 8 ޖަހާއިރު އެވެ. މި ދެޓީމު ވެސް މިހާރު ވަނީ ގަދަ 16 އިން ފުރުސަތު ހޯދައިފަ އެވެ.