ދަރަވަންދޫ އެއާޕޯޓް މި މަހު އައިލެންޑް އޭވިއޭޝަނާ ހަވާލުކުރަނީ
ރާއްޖޭގެ އެންމެ ބާރުބޮޑު އެއް ޑޮމެސްޓިކް އެއާޕޯޓް ކަމަށްވާ ބ. ދަރަވަންދޫ އެއާޕޯޓް، އައިލެންޑް އޭވިއޭޝަން ސާވިސަސްއާ ހަވާލުކުރުމުގެ ހުރިހާ މަސައްކަތްތަކެއް މި މަހުގެ ނިޔަލަށް ނިންމާލެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އިއުލާން ކުރައްވައިފިއެވެ.
މި އަހަރުގެ ރިޔާސީ ބަޔާން އިއްވަވަމުން ރައީސް ވިދާޅުވީ، ދަރަވަންދޫ އެއާޕޯޓް އައިލެންޑް އޭވިއޭޝަންގެ ދަށަށް ބަދަލުކުރުމުގެ އިދާރީ މަސައްކަތްތައް ނިމުމާއެކު، އެ އެއާޕޯޓް އިތުރަށް ތަރައްގީކުރުމުގެ އަމަލީ މަސައްކަތްތައް ވަރަށް އަވަހަށް ފެށިގެންދާނެ ކަމަށެވެ.
މިއީ އެ އެއާޕޯޓުގެ ހިދުމަތްތައް ހަރުދަނާކޮށް، ފެންވަރު މަތިކުރުމަށް ސަރުކާރުން ގެންގުޅޭ ސިޔާސަތުގެ ދަށުން ނިންމެވި ނިންމެވުމެކެވެ.
ދަރަވަންދޫ އެއާޕޯޓުގެ މިލްކުވެރިކަން އައިލެންޑް އޭވިއޭޝަނަށް ބަދަލުކުރަން ނިންމާފައިވާކަން ރައީސް މުއިއްޒު ފުރަތަމަ އިއުލާންކުރެއްވީ މިދިޔަ އަހަރުގެ އޯގަސްޓް މަހު އެ ރަށުގެ ރައްޔިތުންނާ ބައްދަލުކުރައްވައެވެ. ރައީސް އޭރު ވިދާޅުވީ، އެއާޕޯޓަށް އިންވެސްޓްކޮށްފައިވާ ކުންފުންޏާއެކު މަޝްވަރާކޮށް، ސަރުކާރުން ބޭނުންވާ ފެންވަރަށް އެތަން ތަރައްގީކުރުމަށްޓަކައި އައިލެންޑް އޭވިއޭޝަނާ ހަވާލުކުރަން ނިންމާފައިވާ ކަމަށެވެ.
ކޯސްޓްލައިން ހޮޓެލްސް އެންޑް ރިސޯޓްސް އިން ތަރައްގީކޮށް، 2012 ވަނަ އަހަރުގެ އޮކްޓޯބަރު މަހު ހުޅުވި މި އެއާޕޯޓަކީ މިހާރުވެސް އައިލެންޑް އޭވިއޭޝަނުން ހިންގަމުން އަންނަ ތަނެކެވެ. ނަމަވެސް، މި ބަދަލާއެކު އެއާޕޯޓުގެ ފުރިހަމަ ބާރު އެ ކުންފުންޏަށް ލިބިގެންދާނެއެވެ.
އެއާޕޯޓުގެ ޓާމިނަލް ބޮޑުކުރުމާއި ހިދުމަތުގެ ފެންވަރު ރަނގަޅުކުރުމަށްޓަކައި، ޑިޒައިން އެންޑް ކޮންސަލްޓެންސީގެ މަސައްކަތް ކުރުމަށް އަމިއްލަ ކުންފުންޏަކާއެކު އައިލެންޑް އޭވިއޭޝަނުން މިދިޔަ ޑިސެމްބަރު މަހު ވަނީ އެއްބަސްވުމެއްގައި ސޮއިކޮށްފައެވެ.
މި މަޝްރޫއުގެ ސަބަބުން ދަރަވަންދޫ އެއާޕޯޓުން ދޭ ހިދުމަތްތަކަށް ބޮޑު ކުރިއެރުމެއް އަންނާނެ ކަމަށް ބެލެވެއެވެ.
ކޮމެންޓްސް (0)
ލޯޑް ކުރަނީ...