ޒާން ޤުރުއާން ހިތުދަސްކޮށް ރައީސްގެ އިނާމާއި މެޑަލް ހާސިލްކޮށްފި

ކީރިތި ޤުރުއާން ހިތުދަސްކޮށް ހާފިޒު ކަމުގެ ސަނަދު ހާސިލްކުރި ދަރިވަރުންގެ ތެރެއިން، ރައީސުލްޖުމްހޫރިއްޔާ ދެއްވާ ޚާއްސަ އިނާމާއި މެޑަލް ބ. އޭދަފުށީ، ގާދޫ، އަލްޙާފިޡް ޒާން މުޙައްމަދު ޒަމީލު ރޭ ހާސިލްކޮށްފިއެވެ.

އުމުރުން 19 އަހަރުގައި މި ޝަރަފުވެރި މަގާމު ހާސިލްކުރި ޒާން، ގުރުއާން ހިތުދަސްކުރީ އިންޑިއާގެ ކެރެލާގައި ހުންނަ ދާރުއްސަލާމް ޙިފްޡުލް ޤުރްއާން ކޮލެޖުންނެވެ.

އިސްލާމީ މަރުކަޒުގައި ރޭ ބޭއްވި ޚާއްސަ ރަސްމިއްޔާތެއްގައި، ޒާން ހިމެނޭހެން ޖުމްލަ 31 ހާފިޒަކަށް ރައީސް ޑރ. މުހައްމަދު މުއިއްޒު ވަނީ ހަނދާނީ ލިޔުމާއި މެޑަލް ހަވާލުކޮށްދެއްވާފައެވެ.

މިއީ ރާއްޖޭގެ ތާރީޚުގައިވެސް އެއްފަހަރާ އެންމެ ގިނަ ހާފިޒުން ދަސްވެނިވި ރަސްމިއްޔާތެވެ. މިރޭ ސަނަދު ހާސިލްކުރި ހާފިޒުންގެ ތެރޭގައި ހިމެނެނީ 19 ފިރިހެން ހާފިޒުންނާއި 12 އަންހެން ހާފިޒުންނެވެ. މި ހާފިޒުންނަކީ މިދިޔަ ރޯދަ މަހުން ފެށިގެން މި އަހަރުގެ ރޯދަ މަހުގެ ނިޔަލަށް ގުރުއާން ހިތުދަސްކޮށް، ގުރުއާނާ ބެހޭ ގައުމީ މަރުކަޒުގެ ހިފްޒު އިމްތިހާނު ކޮމެޓީއަށް ކިޔައިދީ ފާސްވެފައިވާ ފަރާތްތަކެވެ.

ރަސްމިއްޔާތުގައި ވާހަކަދައްކަވަމުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ، މިއީ ރާއްޖޭގައި އެންމެ ގިނަ ހާފިޒުން އެއް އަހަރެއްގެ ތެރޭގައި އުފެދުނު ފުރަތަމަ ފަހަރު ކަމަށެވެ. މި އާ އަދަދުތަކާއެކު ރާއްޖޭގެ ރަޖިސްޓްރީ ކުރެވިފައިވާ ހާފިޒުންގެ ޖުމްލަ އަދަދު މިހާރު ވަނީ 301 އަށް އަރާފައެވެ. (162 ފިރިހެން އަދި 139 އަންހެން).

މީގެ އިތުރުން، ގުރުއާނާ ބެހޭ މަރުކަޒާއި އެކި އިންސްޓިޓިއުޓްތަކުގައި މިހާރުވެސް 1,800 އެއްހާ ދަރިވަރުން އަންނަނީ ގުރުއާން ހިތުދަސްކުރަމުން ކަމަށް މިނިސްޓަރު ފާހަގަކުރެއްވިއެވެ.