ގޮއިދޫގައި ކެންސަރު އިތުރުވާ ސަބަބު ހޯދަން އެމްއެފްޑީއޭއިން ދިރާސާތައް ފަށައިފި
ބ. ގޮއިދޫގައި ކެންސަރު ބަލި ޖެހޭ މިންވަރު އިތުރުވަމުންދާ މައްސަލައިގައި، އެކަން ދިމާވާ ސަބަބުތައް ދެނެގަތުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އާ ގުޅިގެން ސަރުކާރުން މަސައްކަތް ފަށައިފިއެވެ.
މިކަން ހާމަކުރެއްވީ އެގްރިކަލްޗާ މިނިސްޓްރީން މިއަދު ބޭއްވި ނިއުސް ކޮންފަރެންސެއްގައި މިނިސްޓަރު ޑރ. މަރިޔަމް މާރިޔާއެވެ.
މިނިސްޓަރު މާރިޔާ ވިދާޅުވީ، ގޮއިދޫގައި ކެންސަރު ބަލި އިތުރުވާ ސަބަބުތައް ބެލުމަށްޓަކައި އެމްއެފްޑީއޭއިން ޓެސްޓުތައް ހަދައި، އެކަން ދިމާވާ ސަބަބުތައް ދިރާސާކުރަމުން އަންނަ ކަމަށެވެ. މި މައްސަލައަކީ އެ ރަށުގެ އާންމުންގެ މެދުގައި ބޮޑު ކަންބޮޑުވުމެއް އުފެދިފައިވާ ކަމެކެވެ.
ގޮއިދޫގައި ކެންސަރު ބަލި އިތުރުވަމުންދާ ކަމުގެ ކަންބޮޑުވުން ފުރަތަމަ ފާޅުކުރީ މިދިޔަ އަހަރުގެ ޑިސެމްބަރު މަހު އެ ރަށުގެ ރައްޔިތެއް ކަމަށްވާ ޝަހުލާ ވަޖީހެވެ. އޭނާ ހާމަކުރި މައުލޫމާތުތަކަށް ބަލާއިރު، ގާތްގަނޑަކަށް 500 އެއްހާ މީހުންގެ އާބާދީއެއް އޮންނަ އެ ރަށުގައި ވޭތުވެދިޔަ ފަސް އަހަރު ތެރޭގައި ނުވަ މީހަކަށް ކެންސަރު ޖެހި، އޭގެ ތެރެއިން ތިން މީހަކު ވަނީ މަރުވެފައެވެ.
ޝަހުލާ ފާހަގަކޮށްފައިވާ ގޮތުގައި، ފުޅާދާއިރާއެއްގައި ދަނޑުވެރިކަން ކުރާ އެ ރަށުގެ ދަނޑުތަކުގެ 95 އިންސައްތަ ބަލަހައްޓަނީ ބިދޭސީންނެވެ. އަދި ދަނޑުވެރިކަމުގައި އިންސާނުންގެ ފުރާނައަށް ނުރައްކާވާ މިންވަރަށް ޕެސްޓިސައިޑާއި އެކި ބާވަތުގެ ކެމިކަލް ބޭނުންކުރަމުންދާ ކަމަށް އޭނާ ވަނީ ތުހުމަތުކޮށްފައެވެ.
މި މައްސަލައާ ގުޅިގެން މިނިސްޓަރު މާރިޔާ އިތުރަށް ވިދާޅުވީ، ޕެސްޓިސައިޑް ބޭނުންކުރުމާ ގުޅޭ ގާނޫނެއް އޮތް ނަމަވެސް، އެކަމާ ގުޅޭ ގަވާއިދުތަކާއި ޕޮލިސީތައް ހެދިފައި ނެތުމުގެ ސަބަބުން އެ މަސައްކަތް މިދިޔަ މަހު ފަށާފައިވާ ކަމަށެވެ. “އިރާދަކުރެއްވިއްޔާ ވަރަށް އަވަހަށް މި ޕޮލިސީތައް ތަންފީޒުވެގެންދާނެ ކަމަށް އަޅުގަނޑުމެން މި އުއްމީދު ކުރަނީ،” މިނިސްޓަރު ވިދާޅުވިއެވެ.
ސަރުކާރުގެ އަމާޒަކީ މިފަދަ ކެމިކަލްތަކުގެ ސަބަބުން ރަށްރަށުގެ ރައްޔިތުންގެ ސިއްހަތަށް ކުރާ ނޭދެވޭ އަސަރުތައް ކުޑަކުރުމަށްޓަކައި ހަރުދަނާ އުސޫލުތަކެއް ކަނޑައަޅައި، އެކަންކަން ތަންފީޒުކުރުމެވެ.
ކޮމެންޓްސް (0)
ލޯޑް ކުރަނީ...