ފުޅަދޫގައި ބިކިނީ ލައިގެން ރަށު ތެރޭގައި ޓޫރިސްޓުން އުޅޭނަމަ ޖޫރިމަނާކުރަނީ
ލޯކަލް ޓޫރިޒަމް ފުޅާވަމުން އަންނަ ބ. ފުޅަދޫގެ އާންމު ތަންތަނުގައި އިޖުތިމާއީ މިންގަނޑާ ހިލާފަށް ނިވައިކަން ކުޑަ ހެދުން އަޅައިގެން ފަތުރުވެރިން އުޅޭ ނަމަ އެ ފަތުރުވެރިޔާއަށް ޚިދުމަތްދޭ ގެސްޓްހައުސްއެއް ޖޫރިމަނާ ކުރުމަށް އެ ރަށު ކައުންސިލުން ނިންމައިފިއެވެ.
މި ނިންމުން ނިންމާފައިވަނީ ރަށު ތެރޭގައި ބިކިނީ ފަދަ ހެދުންތައް އަޅައިގެން ފަތުރުވެރިން އުޅޭ މައްސަލާގައި ރައްޔިތުންގެ ޝަކުވާ ބޮޑުވުމާ ގުޅިގެންނެވެ.
ފުޅަދޫ ކައުންސިލުން ކުރި އިއުލާނެއްގައި ބުނެފައިވަނީ، އާންމު ތަންތަނުގައި ފަތުރުވެރިން ހެދުން އަޅާ ގޮތާ މެދު ތަކުރާރުކޮށް ޝަކުވާ ލިބެމުންދާ ކަމަށެވެ. މި މައްސަލަ ހައްލުކުރުމަށް މީގެ ކުރިން ކައުންސިލުން ގިނަ މަސައްކަތްތަކެއް ކޮށްފައިވީ ނަމަވެސް، އެދެވޭ ނަތީޖާއެއް މިހާތަނަށް ފެނިފައި ނުވާ ކަމަށް ކައުންސިލުން ފާހަގަކުރެއެވެ.
އެހެންވެ ކައުންސިލުން މިހާރު ނިންމާފައި ވަނީ، އާންމު ތަންތަނުގައި ނިވާކަން ކުޑަ ހެދުން އަޅައިގެން ފަތުރުވެރިން އުޅޭނަމަ، އެ ފަތުރުވެރިޔާ ރަށަށް ގެނައި ގެސްޓްހައުސް 750 ރުފިޔާއިން ޖޫރިމަނާ ކުރުމަށެވެ.
އާބާދީގައި ގާތްގަނޑަކަށް 300 އެއްހާ މީހުން ދިރިއުޅޭ ފުޅަދޫގައި މިފަދަ ފިޔަވަޅެއް އެޅިއިރު، ރާއްޖޭގެ މީހުން ދިރިއުޅޭ ރަށްރަށުގައި ފަތުރުވެރިން ނިވައިކަން ކުޑަ ހެދުން އެޅުމުގެ މައްސަލަ ހައްލުކޮށްދިނުމަށް އެދި ރައްޔިތުންގެ މަޖިލީހަށް ވެސް ވަނީ ޕެޓިޝަނެއް ހުށަހަޅާފައެވެ. މިފަދަ މައްސަލަތައް އާންމުކޮށް ފެންމަތިވަނީ ލޯކަލް ޓޫރިޒަމްގެ ވިޔަފާރި ކުރިއަރަމުން އަންނަ ރަށްރަށުގައެވެ.
ގިނަ ރަށްރަށުގައި ފަތުރުވެރިންނަށް ހާއްސަ ބީޗުތަކެއް ކަނޑައަޅާފައި އޮތް ނަމަވެސް، ރަށުގެ އާންމު ސަރަހައްދުތަކާއި މީހުން ދިރިއުޅޭ ހިސާބުތަކުގައި އިޖުތިމާއީ މިންގަނޑާ ހިލާފަށް ފަތުރުވެރިން ހަރަކާތްތެރިވާ މައްސަލައަކީ ރަށްރަށުގެ ރައްޔިތުންގެ ބޮޑު ކަންބޮޑުވުމެކެވެ.
ކޮމެންޓްސް (0)
ލޯޑް ކުރަނީ...