ޑުޑޫ މިސް: ކާމިޔާބީގެ ފަހަތުގައި އޮތީ އިސްނެގުމާއި ކެރުން

އެއީ މީގެ 18 އަހަރު ކުރި އެވެ. ބ. އަތޮޅު ތައުލީމީ މަރުކަޒުގެ އެޑްމިނިސްޓްރޭޓިވް އޮފިސަރެއްގެ ވަޒީފާގައި ޝާހިދާ ޢަބްދުލްޣަފޫރު (ޑުޑޫ މިސް) މަސައްކަތްކުރަމުން އައީ އެ މަރުކަޒުގެ ތާރީހް ދުށް އެންމެ އަގުހުރި ހިދުމަތްތެރިޔާ އަލްމަރްހޫމް އަޙްމަދު ޢަލީ (ދޮންބޭބެ) ގެ އިރުޝާދުގެ ދަށުންނެނެވެ. އެ ކުޅަދާނަ މޭސްތިރިޔާގެ އެހީތެރިކަމާއެކު އެތައް ކަމަކަށް ޑުޑޫގެ ލޯ އައީ ހުޅުވެމުންނެވެ. އަގުހުރި އެތައް ފިލާވަޅުތަކެއް އޭނާ އައީ ދަސްކުރަމުންނެވެ. ރާއްޖޭގެ އެންމެ ފަހުރުވެރި ތާރީހެއް އޮތް އަތޮޅު ތައުލީމީ މަރުކަޒުގެ ޑެޕިއުޓީ ޕްރިންސިޕަލްކަމުގެ މަގާމުގައި ޑުޑޫ މިއަދު އެހުރީ އެ ބިންގަލުގެ މަތީގައި ކުރިއަށް އެޅި ހަރުދަނާ ފިޔަވަޅުތަކުގެ ނަތީޖާއެއްގެ ގޮތުންކަން ޔަގީނެވެ.

ފުރަތަމަ ތަޖުރިބާ ވީ ވަރުގަދަ ފިލާވަޅަކަށް

ބ. އަތޮޅު ތައުލީމީ މަރުކަޒު ހިންގުމުގައި ޑުޑޫ އިސް ދައުރެއް އަދާކުރަމުން މިއަދު އަންނަ އިރު އޭނާގެ ސިކުނޑީގައި އެންމެ ވަރުގަދައަށް ބިންވަޅު ނެގިފައި ހުރީ މީގެ އެތައް އަހަރެއް ކުރިން ޑުޑޫއަށް ދޮންބޭބެ އެންމެ ގިނައިން ހަނދާންކޮށްދިން އެއް ވާހަކަ އެވެ.    

“ދޮންބޭބެ ވަރަށް ގިނައިން ބުނާ އެއް ވާހަކައެއް އަބަދުވެސް ހަނދާން ހުރޭ. އެއީ ޓީޗަރަކު ކަމަކު ބުނެފިއްޔާ އެކަމެއް ވީހާވެސް ރަގަޅަކަށް ކޮށްދޭށޭ. އޭރުންނޭ މިތަން ކުރިއަށް ދާނީ.” ބ. އަތޮޅު ތައުލީމީ މަރުކަޒުގައި ކުރި ފުރަތަމަ ތަޖުރިބާގެ ވާހަކަ ހިއްސާކުރަމުން ޑުޑޫ ބުންޏެވެ.

އެއީ ޑުޑޫގެ މަސައްކަތުގައި މިއަދު އެންމެ ވަރުގަދައަށް ހިފަހައްޓާ އެއް އަސާސެވެ. ދަރިވަރުންގެ ކަންކަން ގާތުން ބަލަމުން، ޓީޗަރުންގެ ކޮންމެ ކަންބޮޑުވުމެއް ޑުޑޫ އަހަނީ ހިތްހެޔޮކަމާއެކު އެވެ. އެކަމަށްޓަކައި ކިތަންމެ ގިނަ ވަގުތެއް ހުސްކުރަން ޖެހުނަސް ޑުޑޫގެ ހިތަކަށް އުނދަގުލެއް ނުވެ އެވެ.  

އަސްލު މަންޒިލަށް ދީލާލަން ވަގުތު ނެގި

ރާއްޖޭގައި ގާއިމުކުރި އެންމެ ފުރަތަމަ އަތޮޅު ތައުލީމީ މަރުކަޒުގެ ޑެޕިއުޓީ ޕްރިންސިޕަލެއްގެ މަގާމަށް ޑުޑޫ އައީ ކުރު މަގަކުން ނޫނެވެ. އުނދަގޫ އެތައް މަރުހަލާ އެއް އެ ދަތުރުގައި އޭނާ ކަޑައްތު ކުރި އެވެ. އެތައް ކަމެއް ގުރުބާން ކުރި އެވެ.  އެ ހިސާބަށް ޑުޑޫ އައީ ތައުލީމު ފޯރުކޮށްދިނުމަށްޓަކައި ސްކޫލެއްގައި ހިންގާނެ ހުރިހާ އޮޕަރޭޝަނެއްގައި ހެން އަމަލީ ގޮތުން މަސައްކަތްކޮށް އެ ހުރިހާ ތަޖުރިބާއަކާވެސް އެކު އެވެ.

ޓީޗަރަކަށްވުމަކީ ޑުޑޫގެ ސްކޫލް ދައުރުއްސުރެ ދެކެމުން އައި ހުވަފެނެކެވެ. އެކަމަކު އޯ ލެވެލް ނިންމުމަށްފަހު އިތުރަށް ކިޔަވަން ބޭނުންވި ނަމަވެސް ޑުޑޫ އަށް މަޖުބޫރުވީ ވަޒީފާއަކަށް ދާށެވެ. ސޮނެވާ ފުށީ ރިސޯޓުގެ ސޭލްސް އެސިސްޓެންޓެއްގެ ވާޒީފާއާ 2006 ވަނަ އަހަރު ޑުޑޫ ގުޅުނީ މާލީ ގޮތުން އާއިލާއަށް ކުރިމަތިވެފައި އޮތް ދަތިކަމަށް ލުޔެއް ހޯދުމަށެވެ. ދެ އަހަރެއްހާ ދުވަހު ރަށުން ބޭރުގައި ހުރުމަށް ފަހު މަންމަގެ އެދުމުގެ މަތިން ދެން ބަދަލުވީ ރަށަށެވެ. ތައުލީމީ ދާއިރާގައި ޑުޑޫ ކުރަމުން އަންނަ ހިދުމަތުގެ ދަތުރު ފެށުނީ އެ ހިސާބުންނެވެ.  

“އޭރުވެސް އޮފީހުގެ ކޮލީގުން ބުނޭ ޑުޑޫ ތީ މިތަނުގަ ހުންނަންޖެހޭ ކުއްޖެއް ނޫނޭ. އަވަހަށް ދާން އުޅޭށޭ ކިޔަވަން. ޑުޑޫއަށް ވާނެ އޭ.”

ސްކޫލްގެ އިދާރީ މުވައްޒަފެއްގެ ގޮތުގައި މަސައްކަތްކުރަމުން ދިޔަ ދުވަސްވަރު އެންމެ ގިނައިން އެކުގައި މަސައްކަތްކުރި މުވައްޒަފުން އޭނާ ގާތު ބުނި އެއް ވާހަކައަކީ އެއީ އެވެ.

ޑުޑޫގެ ކެރިއަރާ ދޭތެރޭ ސީރިއަސްކޮށް ވިސްނަން ފެށި ހިސާބަކީ އެއީ އެވެ. ކައިވެނީގެ ގޮށްޖަހައި ހަޔާތުގެ ބައިވެރިޔާއާއެކު ދިރިއުޅެން ފެށިތާ އޭރު އަދި މާ ގިނަ ދުވަހެއް ނުވެ އެވެ. ހިތް ނޭދުނަސް އެ އުފާވެރި ދުވަސްތައް ގުރުބާން ކުރުމަށްފަހު ޑުޑޫ ނިންމީ ޓީޗިންގ ހެދުމަށްޓަކައި މާލެ ބަދަލުވާށެވެ.

ދަތި ދިރިއުޅުމެއްގެ ތެރެއިން ބޮޑު ކާމިޔާބެއް

ޓީޗިންގ ހަދަން ޑުޑޫ މާލޭގައި ހޭދަކުރި ހަތަރު އަހަރަކީ ވެސް އޭނާގެ ހަޔާތުގައި ކުރި ވަރަށް ތަފާތު ތަޖުރިބާ އެކެވެ. ކިޔަވަން މާލޭގައި ހުރީ އަންހެން ކުދިން ބައިތިއްބަން ހާއްސަކޮށްފައި ހުރި ގެއެއްގަ އެވެ. ޑުޑޫ އާއެކު ކުޑަ ތަންކޮޅެއްގައި 14 ކުދިން އުޅެމުން އައެވެ. ނިދަނީވެސް ކިޔަވަން ގެންގުޅޭ ހުރިހާ ފޮތްތަކެއް ބަހައްޓަނީވެސް ބަންކު ބެޑެއްގަ އެވެ. ހަމަޖެހިލައިގެން ކިޔެވުމަށްޓަކައި ގިނަ ވަގުތު ޑުޑޫ ހޭދަކުރީ ޔުނިވަސިޓީގެ ލައިބްރަރީ ގަ އެވެ. ކެއުމުގެ ކަންކަން ހަމަޖައްސާލީ ވަރަށް އާދައިގެ ގޮތަކަށެވެ.

އެކަމަކު އެއިން އެއްވެސް ކަމަކުން ޑުޑޫ ކަނޑައަޅައިގެން ހުރި އަޒުމަކަށް ލޮޅުމެއް ނޭރި އެވެ. އޭނާގެ އޮތީ ހަމަ އެންމެ ވިސްނުމެކެވެ. ކޯސް ނިންމުމަށްފަހު އެނބުރި ރަށަށް ދާން ޑުޑޫ ބޭނުންވީ ފިރިމީހާ އާއި އާއިލާގެ އެންމެން ފަހުރުވެރިވާ ވަރުގެ ނަތީޖާއަކާ އެކު އެވެ.

އެކަން ހާސިލްކުރުމަށްޓަކައި ޑުޑޫ ހިފެހެއްޓީ ވަރުގަދަ ސުލޫކެކެވެ. ފިލާވަޅުތަކާ ގުޅޭ އިތުރު މައުލޫމާތު އަމިއްލައަށް ހޯދަން އެތައް ވަގުތެއް އޭނާ ހޭދަކުރި އެވެ. އެސައިންމެންޓްތައް އެންމެ ފަހު ދުވަހު ނިންމަން މަޑުކުރުމުގެ ބަދަލުގައި ދުރާލާ އެކަމަށް މަސައްކަތް ފަށައެވެ. އެއާއެކު ޑުޑޫ ފުރިހަމަކުރި ބެޗްލާސް އޮފް އާޓްސް އިން އިންގްލިޝް އޭޒް އަ ފޮރިން ލޭންގުއޭޖު ކޯހުން އެއްވަނަ ހޯދައި ރައީސުލްޖުމްހޫރިއްޔާ ދެއްވާ ހާއްސަ އިނާމު އޭނާ ހާސިލްކުރި އެވެ.      

ކެރުމާއި އިސް ނެގުމުން ހާސިލްކުރީ ކުރިއެރުން

އެ ފަހުރުވެރި ކާމިޔާބާއެކު އިނގިރޭސި ކިޔަވައިދޭ ޓީޗަރެއްގެ ގޮތުގައި ޑުޑޫ  އަލުން ތައުލީމީ މަރުކަޒާ ގުޅުނެވެ. އެންމެ ފުރަތަމަ ދުވަހުން ފެށިގެންވެސް އޭނާގެ ފަރާތުން ފެނުނީ މަސައްކަތަށް އޮތް ޝައުގުވެރިކަމާއި ލޯތްބެވެ. ކިޔަވައިދިނުމުގެ އިތުރުން ސްކޫލްގައި ކުރިއަށް ދިޔަ އެހެނިހެން ހަރަކާތްތަކުގައި ޑުޑޫ އަދާކުރަމުން އައިތަން ފެނުނީ ލީޑަޝިޕް ރޯލެކެވެ. އެއާއެކު ކުޑަ ދުވަސްކޮޅެއްގެ ތެރޭގައި ދަރިވަރުންނާއި، އެކުގައި މަސައްކަތްކުރާ މުވައްޒަފުންގެ ލޯބި ޑުޑޫ ހޯދި އެވެ.

ޓީޗަރެއްގެ ގޮތުގައި މަސައްކަތްކުރަމުން އައިއިރު ޑުޑޫގެ މައިގަނޑު ފޯކަސް އަކަށްވީ ހަމަހަމަކަމާއެކު ކުދިންނަށް އުނގަންނައިދިނުމެވެ.

“އަޅުގަނޑު ވަރަށް ބޮޑު ސަމާލުކަމެއް ދެން އެއް ކުއްޖަކު އަނެއް ކުއްޖަކާ ތަފާތު ނުކޮށް ދަރިވަރުން ދަރިވަރުންގެ ގޮތުގަ ބަލައިގަނެގެން ލެސަންތައް ކުރިއަށް ގެންދަން.” އީޓީ އަށް ދިން އިންޓަވިއުއެއްގައި ޑުޑޫ ބުނެފައިވެ އެވެ.

ޑުޑޫ ގަބޫލުކުރާ ގޮތުގައި ބ. އަތޮޅު ތައުލީމީ މަރުކަޒަށް ހިދުމަތްކުރުމަކީ އޭނާ އަށް ލިބޭ ބޮޑު އުފަލެކެވެ. ކުދިންނަށް އުނގަންނައިދިނުން އިތުރަށް ހަރުދަނާ ކުރުމަށްޓަކައި ފޯރުކޮށްދެވޭ އެހީތެރިކަމަކީ އޭނާއަށް ލިބޭ އެންމެ ބޮޑު އެއް ހިތްހަމަޖެހުމެވެ.

“އަޅުގަނޑު ވަރަށް އުފާވޭ ބ. އަތޮޅު ތައުލީމީ މަރުކަޒުގެ ވާހަކަ ދައްކާއިރު ބުނެވޭނެ ވަރަށް ފަހުރުވެރިކަމާއެކު މިއީ ވަރަށް ރަގަޅު ތައުލީމެއް ދޭ ތަނެކޭ. ދެން ކުރިއަށް އޮތް ތަނުގަވެސް އަޅުގަނޑުމެން އުންމީދުކުރަން މި ސްޓޭންޑަޑް ހަމަ ހިފަހައްޓާލެވޭނެ ކަމަށް.” ތައުލީމީ މަރުކަޒުގެ ކުރިމަގާ މެދު ޑުޑޫގެ އޮތީ ފޮނި އުންމީދެކެވެ.

މިހާތަނަށް ތައުލީމީ މަރުކަޒުގައި ކޮށްފައިވާ މަސައްކަތްތަކުގެ ތެރެއިން ޑުޑޫ އެންމެ ހިތްހަމަޖެހުމާއެކު ފާހަގަކުރި އެއްކަމަކީ ސްޓުޑެންޓް އެކްސްޗޭންޖު ޕްރޮގްރާމްގެ ދަށުން އިންޑިއާގެ މުމްބާއީގައި ކިޔަވާ ބައެއް ދަރިވަރުން އަތޮޅު ތައުލީމީ މަރުކަޒަށް ކުރި ޒިޔާރަތާ ގުޅިގެން ކުރި މަސައްކަތެވެ. މިއީ މުޅި ސްކޫލްގެ ތާރީހުގައިވެސް ކުރިއަށްގެންދިޔަ މިފަދަ ފުރަތަމަ ޕްރޮގްރާމަށްވެފައި އެ ހަރަކާތް ލީޑް ކޮށްފައިވަނީ ޑުޑޫ އެވެ.

އެފަދަ ގިނަ ހަރަކާތްތަކުގައި ޑުޑޫ އިސް ދައުރެއް އަދާކުރުންވީ ހަރުފަތަކަށްފަހު ހަރުފަތެއް ކުރިއަށް ޖެހެން އޭނާއަށް މަގުފަހިވި ކަމަކަށެވެ.

“އަޅުގަނޑަށް ގަބޫލުކުރެވޭ ގޮތުގަ އަޅުގަނޑުގެ ގައިގަ މި ހުންނަ ކެރުމުގެ ސިފަ ކަންނޭގެ އެންމެ ބޮޑު ރޯލެއް އަދާ މިކުރީ މި ހިސާބަށް އައުމުގަ.” ޓީޗަރެއްގެ ގޮތުގައި މަސައްކަތްކުރަމުން 2018 ވަނަ އަހަރު މާސްޓާސް އޮފް އާޓްސް އިން އެޑިއުކޭޝަން ފުރިހަމަކޮށްފައިވާ ޑުޑޫ ބުންޏެވެ.