އުރީދޫން ހިއްސާއަކަށް 3.53ރ. ބަހަން ފާސްކޮށްފި

މިދިޔަ އަހަރު އުރީދޫ މޯލްޑިވްސްއަށް ލިބުނު ސާފު ފައިދާއިން ހިއްސާދާރުންނަށް ބަހާނެ އަދަދަކީ ހިއްސާއަކަށް 3.53 ރުފިޔާ ކަމަށް އެ ކުންފުނީގެ އަހަރީ އާންމު ޖަލްސާގައި ފާސްކޮށްފިއެވެ.

މި ނިންމުން ނިންމާފައިވަނީ މިދިޔަ ބުދަ ދުވަހުގެ ރޭ އުރީދޫ ހެޑް އޮފީހުގައި ބޭއްވި އެ ކުންފުނީގެ އަހަރީ އާންމު ޖަލްސާގައެވެ.

މި ޖަލްސާގައި އުރީދޫގެ ޖުމުލަ ހިއްސާގެ 98 ޕަސެންޓު ތަމްސީލުކުރާ 353 ހިއްސާދާރުން ބައިވެރިވެފައިވެއެވެ. މީގެ ތެރޭގައި ޖަލްސާއަށް ހާޒިރުވި 144 ހިއްސާދާރުންނާއި، 209 ހިއްސާދާރުން ތަމްސީލުކުރި 27 ޕްރޮކްސީން ހިމެނެއެވެ. މި އަހަރުގެ ޖަލްސާ ކުރިއަށް ގެންގޮސްފައިވަނީ އޮފީހަށް ހާޒިރުވެގެންނާއި މޯލްޑިވްސް ސެކިއުރިޓީޒް ޑިޕޮސިޓަރީގެ ފަހިވޯޓް މެދުވެރިކޮށް އޮންލައިންކޮށެވެ.

ފައިދާ ބެހުމުގެ އިތުރުން، މި ޖަލްސާގައި ވަނީ މިދިޔަ އަހަރުގެ އަހަރީ އާންމު ޖަލްސާގެ ޔައުމިއްޔާ އާއި، އޮޑިޓް ކުރެވިފައިވާ މާލީ ބަޔާންތަކުގެ އިތުރުން ޑިރެކްޓަރުންގެ ރިޕޯޓް ވެސް ފާސްކޮށްފައެވެ. އަދި ކުރިއަށް އޮތް އަހަރަށް ކުންފުނީގެ އޮޑިޓަރުންގެ ގޮތުގައި ކޭޕީއެމްޖީ އައްޔަންކުރުމަށް ވެސް ހިއްސާދާރުން ވަނީ ނިންމާފައެވެ.

ކުންފުނީގެ ހިންގާ ބޯޑަށް މެންބަރުން އައްޔަންކުރުމުގެ ތެރެއިން، މެޖޯރިޓީ ހިއްސާދާރު ވަތަނިއްޔާ އިންޓަނޭޝަނަލް ތަމްސީލުކުރުމަށް ފާތިމަތު ސުލްތޯން އަލް-ކުވާރީ އަލުން އައްޔަންކޮށްފައިވެއެވެ. މީގެ އިތުރުން އާންމު ހިއްސާދާރުންގެ ފަރާތުން ބޯޑުގައި އިންނަވާނެ ޑިރެކްޓަރަކަށް އައްޔަންކޮށްފައިވަނީ އަބްދުﷲ އަލީއެވެ.

އުރީދޫ މޯލްޑިވްސްއަކީ 2016 ވަނަ އަހަރުން ފެށިގެން ޕަބްލިކް ކުންފުންޏަކަށް ބަދަލުވެ، އާންމުންނަށް ހިއްސާ ވިއްކަން ފެށި ކުންފުންޏެކެވެ. އެ ކުންފުނިން އަންނަނީ އަހަރުން އަހަރަށް އާމްދަނީ އާއި ފައިދާ އިތުރުކޮށް، ހިއްސާދާރުންނަށް އެކަށީގެންވާ ނަފާއެއް ފޯރުކޮށްދެމުންނެވެ.