އެފްއޭއެމް އެޓޯލް ޗެމްޕިއަންޝިޕްގެ ރީޖަނަލް ކޮލިފައިން ހަ ރަށެއްގައި ފަށަނީ

ދިވެހި ޕްރިމިއާ ލީގު މުޅި ރާއްޖެއަށް ފުޅާކުރުމަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުރިއަށްގެންދާ ބީއެމްއެލް އެފްއޭއެމް އެޓޯލް ޗެމްޕިއަންޝިޕްގެ ރީޖަނަލް ކޮލިފައިން މެޗުތައް މި މަހުގެ ތެރޭގައި ހަ ރަށެއްގައި ބޭއްވުމަށް އެ އިދާރާއިން ނިންމައިފިއެވެ.

މިއީ ރާއްޖޭގެ ފުޓްބޯޅަ އޮނިގަނޑަށް ގެނައި ބަދަލާއެކު، އަތޮޅުތަކުގެ ޓީމުތަކަށް ފުރަތަމަ ޑިވިޝަނާ ހަމައަށް ދިއުމުގެ ފުރުސަތު ހުޅުވާލުމުގެ ގޮތުން ކުރިއަށްގެންދާ މުބާރާތެކެވެ.

މުބާރާތް ބާއްވާނެ ރަށްތަކާއި ތާރީހުތައް

އެފްއޭއެމް އިން ވަނީ ރާއްޖެ ހަތަރު ރީޖަނަކަށް ބަހާލާފައެވެ. އެއީ ނޯތު، ސެންޓްރަލް، ސައުތު އަދި މާލެ ރީޖަނެވެ. މީގެ ތެރެއިން މާލެ ފިޔަވައި އަނެއް ތިން ރީޖަންގެ ކޮލިފައިން ބޭއްވުމަށް ހަމަޖެހިފައިވަނީ އަންނަނިވި ރަށްތަކުގައެވެ:

• ނޯތު ރީޖަން: ޒޯން 1 (ހއ. ދިއްދޫ) އޭޕްރީލް 18-28 އަށް، އަދި ޒޯން 2 (ބ. އޭދަފުށި) އޭޕްރީލް 15-30 އަށް.
• ސެންޓްރަލް ރީޖަން: ޒޯން 1 (އދ. މަހިބަދޫ) އޭޕްރީލް 15-30 އަށް، އަދި ޒޯން 2 (ދ. މީދޫ) އޭޕްރީލް 15-28 އަށް.
• ސައުތު ރީޖަން: ޒޯން 1 (ލ. ގަން) އޭޕްރީލް 18-28 އަށް، އަދި ޒޯން 2 (ގދ. ގައްދޫ) އޭޕްރީލް 18-28 އަށް.

އެފްއޭއެމްގެ އެކްޓިން ޖެނެރަލް ސެކްރެޓަރީ އަހުމަދު ޒަރީރު ވިދާޅުވީ، މުބާރާތް ބާއްވާނެ ރަށްތައް ކަނޑައެޅީ ހުށަހެޅި ޕްރޮޕޯސަލްތަކަށް ބަލައި، އެ ރަށްރަށުގައި ހުރި ވަސީލަތްތަކާއި މީގެ ކުރިން މުބާރާތްތައް އިންތިޒާމުކޮށްފައިވާ ފެންވަރަށް ރިއާޔަތްކުރުމަށް ފަހު ކަމަށެވެ.

ލީގު އޮނިގަނޑަށް އަންނަ ބަދަލު

އާ އޮނިގަނޑުގެ ދަށުން 2026/2027 ވަނަ އަހަރުގެ ދިވެހި ޕްރިމިއާ ލީގުން ޖާގަ ލިބޭނީ ޖުމްލަ 10 ޓީމަށެވެ. މިހާރުގެ ލީގުގެ ގަދަ ހަ ޓީމަށް ސީދާ ޖާގަ ލިބިފައިވާއިރު، ފުލަށް ދިޔަ ދެ ޓީމު ވަނީ ދެވަނަ ޑިވިޝަނަށް ރެލިގޭޓްވެފައެވެ. ލީގުގެ ހަތްވަނަ އަދި އަށްވަނަ ހޯދި ޓީސީ ސްޕޯޓްސް ކްލަބާއި ގްރީން ސްޓްރީޓްސް ޖެހޭނީ ކޮލިފިކޭޝަން ބުރުގައި ކުޅޭށެވެ.

ޕްރިމިއާ ލީގުގެ ކޮލިފިކޭޝަން ބުރުގައި ވާދަކުރާނީ ލީގުގެ ހަތްވަނަ އަދި އަށްވަނަ ޓީމުގެ އިތުރުން، ނޯތު، ސެންޓްރަލް، ސައުތު އަދި މާލެ ލީގުގެ ޗެމްޕިއަނުންނެވެ. މި ހަ ޓީމުގެ މެދުގައި ކުޅެވޭ ކޮލިފިކޭޝަނުން ގަދަ ހަތަރު ޓީމަށް 2026/2027 ގެ ޕްރިމިއާ ލީގުން ފުރުސަތު ލިބިގެންދާނެއެވެ.