އަންހެނުން ކޮމިޓީ ރައީސާއިންގެ މުސާރަ އަނެއްކާ ބަދަލުކޮށްފި

ސިޓީތަކާއި ރަށްރަށުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ތަކުގެ މެންބަރުންނަށް ދިނުމަށް ކުރިން ނިންމި ބޮޑު މުސާރައަށް އާންމުންގެ ބޮޑެތި ފާޑުކިޔުންތަކެއް އަމާޒުވުމާ ގުޅިގެން، އެ މުސާރަތައް ކުޑަކުރުމަށް ފިނޭންސް މިނިސްޓްރީން ނިންމައިފިއެވެ.

މި ބަދަލާއެކު، މީގެ ކުރިން ކަނޑައެޅި ބޮޑު އަދަދުތަކަށް ވަނީ ބޮޑެތި ބަދަލުތަކެއް ގެނެސްފައެވެ.

ފިނޭންސް މިނިސްޓްރީން އެންމެ ފަހުން ކަނޑައެޅި ގޮތުގައި، ސިޓީ ކައުންސިލްތަކުގެ ޑަބްލިއުޑީސީ ރައީސުންނަށް ދެން ލިބޭނީ މަހަކު 20,000 ރުފިޔާއެވެ. އަދި ނައިބު ރައީސުންނަށް 7,000 ރުފިޔާ ދޭން ނިންމާފައިވާއިރު، މެންބަރުންނަށް ދޭނީ 6,000 ރުފިޔާއެވެ. މީގެ އިތުރުން، ރަށްރަށުގެ ޑަބްލިއުޑީސީތަކުގެ ރައީސުންނަށް 15,000 ރުފިޔާ، ނައިބު ރައީސުންނަށް 6,000 ރުފިޔާ އަދި މެންބަރުންނަށް 5,000 ރުފިޔާ ދިނުމަށް ވަނީ ހަމަޖައްސާފައެވެ.

މި އަދަދުތައް ފިނޭންސުން ކަނޑައަޅާފައި މިވަނީ، މުސާރަތައް ބޮޑުކުރުމަށް ނޭޝަނަލް ޕޭ ކޮމިޝަނުން ކުރިން ނިންމި ނިންމުމަށް އާންމުންގެ ފާޑުކިޔުން ވަރަށް ބޮޑަށް އަމާޒުވެފައިވަނިކޮށެވެ. ޕޭ ކޮމިޝަނުން އެންމެ ފުރަތަމަ ނިންމާފައި އޮތީ ސިޓީތަކުގެ ޑަބްލިއުޑީސީ ރައީސުންނަށް 41,000 ރުފިޔާ އަދި ރަށްރަށުގެ ރައީސުންނަށް 21,000 ރުފިޔާ ދިނުމަށެވެ. ނަމަވެސް، ދައުލަތުގެ ޚަރަދުތައް ކުޑަކުރަންޖެހިފައިވާ ދަނޑިވަޅެއްގައި، މިފަދަ ބޮޑު އުޖޫރައެއް ކަނޑައެޅުމުން ސޯޝަލް މީޑިއާގައާއި އާންމުންގެ ތެރޭގައި ބޮޑެތި ކަންބޮޑުވުންތަކެއް ފާޅުކޮށްފައިވެއެވެ.

އެ ފާޑުކިޔުންތަކާ ގުޅިގެން، ސިޓީތަކުގެ ރައީސުންގެ މުސާރަ 33,000 ރުފިޔާއަށް ކުޑަކުރަން ވެސް މީގެ ކުރިން ނިންމިއެވެ. އެހެންނަމަވެސް، ފިނޭންސުން މިހާރު މިވަނީ އެ އަދަދު 20,000 ރުފިޔާއަށް ތިރިކޮށް، ރަށްރަށުގެ ރައީސުންގެ މުސާރަ ވެސް 15,000 ރުފިޔާއަށް ކުޑަކޮށްފައެވެ. މި ބަދަލުތައް ގެނައުމުގެ ކުރިން ސިޓީތަކުގެ ޑަބްލިއުޑީސީ ރައީސާއިންނަށް ލިބެމުން އައީ 7,000 ރުފިޔާއެވެ. އަދި ރަށްރަށުގެ ރައީސާއިންނަށް ލިބެމުން އައީ 6,000 ރުފިޔާއެވެ.

އަންހެނުންގެ ކޮމިޓީތަކުގެ މެންބަރުންގެ މުސާރަ ބޮޑުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންފައިވާ ވައުދުފުޅެކެވެ. އެމަނިކުފާނު ވިދާޅުވެފައިވަނީ އަންހެނުންގެ ކޮމިޓީތައް ބާރުވެރިކޮށް، އެ ކޮމިޓީތަކުގެ ބަޖެޓު ދެގުނަ ކޮށްދެއްވާނެ ކަމަށެވެ. މުސާރައަށް ގެނައި މި ބަދަލުގެ އިތުރުން، މިދިޔަ ރަމަޟާން މަހާ ދިމާކޮށް އަންހެނުންގެ ކޮމިޓީތަކުގެ މެންބަރުންނަށް ރޯދަ އެލަވަންސް ދިނުމަށް ވެސް ރައްޔިތުންގެ މަޖިލީހުން ވަނީ ފާސްކޮށްފައެވެ.