ކުނި މެނޭޖް ކުރަން ބޭނުންވާ ސާމާނު ބ. އަތޮޅުގެ ހުރިހާ ރަށްރަށަކާ ހަވާލުކޮށްފި އެވެ.
އެންވަޔަރްމެންޓް މިނިސްޓްރީގައި މިދިޔަ ބުރާސްފަތި ދުވަހު ބޭއްވި ރަސްމިއްޔާތެއްގައި އެ ތަކެތި ހަވާލު ކުރި ކަމުގެ ލިޔުން މިއަތޮޅު ކައުންސިލުގެ ރައީސް މުހައްމަދު އާދިލުއާ ހަވާލުކޮށް ދެއްވީ އެންވަޔަރްމެންޓް މިނިސްޓަރު ތޯރިގް އިބްރާހިމެވެ.
މޯލްޑިވްސް އެންވަޔަރްމެންޓަލް މެނޭޖްމަންޓް ޕްރޮޖެކްޓާއި އަރިއެޓޯލް ސޮލިޑް ވޭސްޓް މެނޭޖްމަންޓް ޕްރޮޖެކްޓްގެ ދަށުން ބ. އަތޮޅުގެ އިތުރުން އިތުރު ފަސް އަތޮޅެއްގެ 37 ރަށަކަށް ކުނި މެނޭޖް ކުރަން ބޭނުންވާ ސާމާނުތައް ވަނީ ހަވާލުކޮށްފައެވެ.
ހަތް މިލިއަން ރުފިޔާގެ އެ ތަކެތި ހަވާލުކޮށް ދެއްވުމަށް ފަހު މިނިސްޓަރު ތޯރިގް ވިދާޅުވީ ކުނި މެނޭޖް ކުރުމަށް ސަރުކާރުން ވަރަށް ބޮޑަށް އިސްކަން ދޭ ކަމަށާއި ކުރިއަށް އޮތް ތަނުގައި ވެސް އެކަމަށް ސަރުކާރުން އެހީތެރިވެދޭނެ ކަމަށެވެ. އަދި އެ ތަކެތި ފޯރުކޮށްދިން ރަށްރަށުން އޭގެ ފުރިހަމަ ބޭނުންކޮށް، އެކަމަށް ރައްޔިތުން ހޭލުންތެރި ކުރުމަށް އެ ރަށްރަށުގެ ކައުންސިލްތަކުގެ ކިބައިން މިނިސްޓަރު ތޯރިގް އެދިވަޑައިގަތެވެ.
ކުނި މެނޭޖް ކުރުމަށް ބޭނުންވާ ސާމާނު އެ ރަށްރަށަށް ފޯރުކޮށް ދިނުމަށް ވިންލޭންޑް ޕްރައިވެޓް ލިމިޓެޑާއި އެކު އެއްބަސްވުމެއްގައި ވެސް ބުރާސްފަތި ދުވަހު ސޮއިކުރި އެވެ.
