މިއަހަރުގެ އަޟްހާ އީދުގެ ކުޅިވަރުތައް އޭދަފުށީގައި ފެށިގެން ކުރިއަށް އެބަދެ އެވެ.
އީދު ކުޅިވަރުތައް ފެށުމުގެ ގޮތުން ޖަމިއްޔަތުލް ވަފާއިން މިރޭ ވަނީ އީދު ބަޑި ރޯކޮށްފަ އެވެ. އަދި މިއަދު މެންދުރުފަހު ވަނީ އައްޑަނަ ތިންމުގޯލި އަދި ބަށި މުބާރާތްވެސް ފަށައިފަ އެވެ.
ވަފާ ޖަމިއްޔާއިން ބުނިގޮތުގައި “ހުޅަނގު އުފާ” އީދު ކުޅިވަރު ތަކުގެ ތެރޭގައި ހިމެނޭ މިއުޒިކް ޝޯ މާދަމާ ރެ އިން ފެށިގެން އީދު ނިމެންދެން ކުރިއަށްދާނެ އެވެ.
ކޮންމެ އަހަރެއްގެ އަޟްހާ އީދު ބަންދާ ދިމާކޮށް އޭދަފުށީގައި ބާއްވާ ފުޓްބޯޅަ މުބާރާތްވެސް މިއަދު ހަވީރު ވަނީ ފަށައިފަ އެވެ. އެސްޓީއޯ ނޫފަހި ފުޓްބޯލް ޗެލެންޖުގެ ނަމުގައި ފެށި މި މުބާރާތުގައި މިއަދު ހަވީރު އޭދަފުށީ ޔޫތު ޖެނެރޭޝަން އާއި ބައްދަލުކޮށް 5-1 އިން މޮޅުވީ ސައިނޯސާ ފުޓްބޯޅަ ޓީމެވެ. މިއަހަރުގެ މުބާރާތުގައިވެސް ފުރަތަމަ ޑިވިސަންގެ ގިނަ އަދަދެއްގެ ކުޅުންތެރިން ހިމެނެ އެވެ.
އެހެން އަހަރުތަކާ ޚިލާފަށް އޭދަފުށީ ކައުންސިލާއި ކްލަބް ޖަމިއްޔާތައް ގުޅިގެން މިއަހަރު ބާއްވާ “ބީއެމްއެލް އީދު ފެސްޓިވަލް” ފަށާނީ މާދަމާ އެވެ. މި ފެސްޓިވަލު ކުރިއަށްދާނީ ދެކުނު ފަރާތު ހިއްކި ބިމުގަ އެވެ.
“މާދަމާ ހެނދުނު 9:00 ގައި ތިންމުގޯލި އަދި ހަވީރު ބަށި މުބާރާތް ފަށާނެ. އާއިލީ ހަވީރު ވެސް މާދަމާއިން ފެށިގެން ކޮންމެ ދުވަހެއްގެ ހަވީރު އެ ސަރައްދުގައި ކުރިއަށްދާނެ. ބައިބަލާ އާއި ވާދެމުން ކުރިއަށްދާނީ ރޭނޑު އޮންނަ މިއުޒިކް ޝޯގެ ތެރެއިން” އީދު ފެސްޓިވަލުގެ ކޮމެޓީގެ އޮފިސަލު ބުންޏެވެ.
އީދު ފެސްޓިވަލް ކޮމެޓީން ބުނީ މިއުޒިކް ޝޯ ގައި މަތާރަން ބޮޑުބެރު ގްރޫޕްގެ އިތުރުން މަސްހޫރު ބައެއް ފަންނާލުން ފެނިގެންދާނެ ކަމަށެވެ.
އީދު ޗުއްޓީ ހޭދަކުރުމަށް ގިނަ އަދަދެއްގެ ބަޔަކު މިއަހަރުވެސް އޭދަފުށްޓަށް ވަނީ އައިސްފަ އެވެ.
