ބ. އޭދަފުށީގެ އިރުމަތީ ސަރަހައްދު ހުރަސްތޮށީގެ ކެޕިން ބީމް (ކޮންކްރީޓްބައި) ގެ މަސައްކަތްތައް ކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހައުސިން މިނިސްޓްރީން މިއަދު ހަވާލުކޮށްފި އެވެ.
ބަނދަރު އިތުރަށް ތަރައްގީކުރުމުގެ މި މަޝްރޫގެ ދަށުން އޭދަފުށިގެ ބަނދަރުގެ އިރުމަތީ ފަރާތުން 97 މީޓަރު އެއްގަމު ތޮށީގެ ކެޕިން ބީމް ހެދުމުގެ މަސައްކަތް 60 ދުވަހުގެ ތެރޭގައި އެމްޓީސީސީން ނިންމަން ޖެހެ އެވެ.
ހައުސިން މިނިސްޓްރީގައި އޮތް ރަސްމިއްޔާތެއްގައި މި މަޝްރޫއުގެ އެއްބަސްވުންތަކުގައި ސޮއިކުރެއްވީ ހައުސިން މިނިސްޓަރު ޑރ މުއިއްޒު އާއި އެމްޓީސީސީގެ ސީއީއޯ އިބްރާހިމް އަބްދުއްރައްޒާގް ހަލީމެވެ.
އޭދަފުށީގެ އިތުރުން ނ. މަނަދޫ އާއި ހދ. ކުމުން ބަނދަރު އިތުރަށް ތަރައްގީ ކުރުމަށްވެސް މިއަދުވަނީ އެމްޓީސީސީ އާ ހަވާޅުކޮށްފައެވެ. އެގޮތުން ތިން ރަށުގައި ހިންގާ މި މަޝްރޫއަށް ސަރުކާރުން 29 މިލިއަން ރުފިޔާ ހަރަދުކުރާނެ ކަމަށްވެސް މިނިސްޓްރީން ބުންޏެވެ.
ތިންސަތޭކަ ފޫޓެއްހާ ދިގު އޭދަފުށީ ބަނދަރުގެ އިރުމަތީ ހުރަސްތޮށީގައި ޝީޓްޕައިލް ޖަހައިފައިވަނީ 2010 ވަނަ އަހަރު ރަށު ރައްޔިތުންގެ މާލިއްޔަތުން ބައި މިލިޔަނެއްހާރުފިޔާ ހަރަދުކޮށްގެންނެވެ. އޭރު އަރިއަޅާލައި ކޮންމެވެސްވަރަކަށް ވެއްޓިފައިއޮތް ކޮންކްރީޓް ވާޓަރު ނަގައި، ޝީޓްފައިލް ޖެހިގޮތަށް ކޮންކްރީޓްބައިނާޅައި އެތަން އަދިވެސް އެ އޮތްގޮތަށް އޮތީއެވެ.
