ބ. އަތޮޅު ތައުލީމީ މަރުކަޒުގެ ދަރިވަރުން ރަށުގެ ގޮނޑުދޮށް ސާފުކުރުމުގެ ޕްރޮގްރާމެއް ހިންގައިފި އެވެ.
ބ. އަތޮޅު ތައުލީމީ މަރުކަޒުން ބުނީ މިއަދު ހިންގުނު ސާފުކުރުމުގެ ޕްރޮގްރާމަކީ، ސްކޫލްތަކުގެ ދަރިވަރުންގެ ހިތްތަކުގައި އިޖުތިމާއީ ރޫހް އާލާކުރުވައި، ކަންކަމަށް ޒިންމާދާރުކުރުމުގެ ގޮތުން އެޑިޔުކޭޝަނުން މިއަހަރު ތައާރަފުކުރި ޕްރޮގްރާމުގެ ދަށުން ހިންގުނު ހަރަކާތެއް ކަމަށެވެ.
މިއަދު ހެނދުނު 6:00 އިން 8:00 އާ ހަމައަށް ކުރި މަސައްކަތުން މި ރަށުގެ ގޮނޑުދޮށުން ގިނަ އަދަދެއްގެ ކުނި ވަނީ ނަގައިފަ އެވެ. އޭގެ ތެރޭގައި ޕްލާސްތިކް ފުޅި އާއި ކޮތަޅު އަދި ދަޅުފަދަ ތަކެތި ހިމެނެ އެވެ. މި މަސައްކަތުގައި އެ ސްކޫލުގެ އެ ސްކޫލުގެ ގްރޭޑް 4 ން މަތީގެ ގިނަ އަދަދެއްގެ ދަރިވަރުން ހަރަކާތްތެރިވި އެވެ.
ދަރިވަރުންގެ އިޖުތިމާއީ ހިދުމަތަކީ ސްކޫލުތަކުގެ ދިރާސީ ހަރަކާތެއްގެ ގޮތުގައި އެޑިޔުކޭޝަނުން މިއަހަރު އަލަށް ތައާރަފުކުރި ޕްރޮގްރާމެކެވެ. މި ޕްރޮގްރާމުގެ ދަށުން ހިންގޭ ހަރަކާތްތަކުގައި އެކަކު އަނެކަކަށް އެހީތެރިވުމުގެ ގޮތުން ކޮންމެވެސް ކަމެއް ކުރުމާއި، ރަށުގައިކުރާ އިޖުތިމާއީ މަސައްކަތްތަކުގައި ހިލޭ ސާބަހަށް ބައިވެރިވުމާއި އަދި ރަށުގެ ތަރައްގީއަށް ކުރެވޭ މަސައްކަތްތަކުގައި އަމަލީގޮތުން ދަރިވަރުން ބައިވެރިކުރުވަން ޖެހެ އެވެ.
އެގޮތުން މި ޕްރޮގްރާމްގެ ދަށުން ގްރޭޑް 4-7 އާއި ހުރިހާ ދަރިވަރުންވެސް ކޮންމެ ދިރާސީ އަހަރަކު އިޖުތިމާއީ ހިދުމަތުގައި 12 ގަޑިއިރު ހޭދަކުރަން ޖެހޭއިރު، ގްރޭޑް 8-12 އާއި ދެމެދު ދަރިވަރުން 16 ގަޑިއިރު ހޭދަކުރަންޖެހެ އެވެ.