އޭދަފުށި ސާފުކުރުމުގެ ޕްރޮގްރާމެއް މިއަދު ފަށައިފި އެވެ.
އޭދަފުށީ ކައުންސިލާއި ސަރުކާރުގެ އިދާރާ އަދި އަމިއްލަ ކުންފުނިތައް ގުޅިގެން ފެށި މި ޕްރޮގްރާމަކީ “މަދިރި ރުޅި-ރުޅި” ކެމްޕޭނުގެ ދަށުން މަދިރި އުފެދޭ ތަންތަން ނައްތާލުމަށާއި ރަށުތެރެ ސާފުކޮށް ބޭއްވުމުގެ ގޮތުން ފެށި ޕްރޮގްރާމެއް ކަމަށް ރަށޫ ކައުންސިލުން ބުންޏެވެ.
މިއަދު ހެނދުނު ކުރިއަށްގެންދިޔަ މި ޕްރޮގްރާމުގައި ރަށުގެ ގޮނޑު ދޮށުންނާއި ރަށުތެރޭގެ އެކި ސަރަހައްދުތަކުން ގިނަ އަދަދެއްގެ ގިނަ އަދަދެއްގެ ކުނި ނެގިފައިވާއިރު އާންމު ގޮތެއްގައި ނެގިފައިވަނީ ޕްލާސްޓިކް ފުޅިއާއި ދަޅާއި ނެޕީފަދަ ތަކެއްޗެވެ.
ރަށު ކައުންސިލުގެ ޒިންމާދާރުވެރިޔާ ނިއުމާ އަހުމަދު ވިދާޅުވީ މި ޕްރޮގްރާމުގެ ދަށުން ކުރިއަށްއޮތް ހަފްތާގައިވެސް ގިނަ ހަރަކާތްތަކެއް ރަށުގައި ހިންގޭނެ ކަމަށެވެ. ސާފުކުރުމުގެ މި ޕްރޮގްރާމަށް އާއްމުންގެ އެހީތެރިކަން ވަރަށް ބޮޑަށް ބޭނުންވާ ކަމަށްވެސް ނިއުމާ ވިދާޅުވި އެވެ.
މި ޕްރޮގްރާމްގައި އާންމުންގެ އެއްބާރުލުން ހޯދުމަށް ޓަކައި ރަށު ކައުންސިލުންވަނީ އަޑުގަދަކުރާ މެދުވެރިކޮށް އާއްމުން ބައިވެރިވުމަށް އެދިފަ އެވެ. އަދި އޮފީސްތަކުގެ މުވައްޒަފުންނާއި ސްކޫލު ދަރިވަރުން މި ޕްރޮގްރާމުގައި ބައިވެރިކޮށްދިނުުމަށް ވަނީ ލިޔުމުން އެ އިދާރާތަކަށް ވެސް އަންގައިފަ އެވެ. އެހެން ނަމަވެސް، މިއަދު އެ ޕްރޮގްރާމް ކުރިއަށް ދިޔައިރު، ސާފުކުރުމުގެ ޕްރޮގްރާމްގައި އާންމުންނާއި މުވައްޒަފުން އަދި ދަރިވަރުންގެ ބައިވެރިވި ތަން ފެނުނީ ވަރަށް ކުޑަކޮށެވެ.